Shillong, Naitung 22: Ki khun ki hajar ka Hima Langrin kila ai por 15 sngi iaka Khasi Hills Autonomous District Council (KHADC) ban weng noh ia u Nongtei Sing Syiemiong naka shuki Syiem ka Hima Langrin daka byrngem ba ki paidbah ka Hima kin wan shah thngan ha phyllaw ka District Council.
Ia kane ka jingbyrngem la pynbna da u Convener Khun ki Hajar Hima Langrin u samla Wadladkyrpang L Langrin hadien ba wai ka jingialang bad ka Executive Committee (EC) haka jingdonlang u Chief Executive Member (CEM) ka KHADC.
Haba pynbna iaka rai u samla Wadladkyrpang ula ong “Haka jingialang bad u CEM ka KHADC ngi la iakren shibun ki mat haba iadei bad ka jingujor jong ngi shaka District Council pyrshah ia u Syiem Nongtei Sing Syiemiong kaba naduh 2023 bad don ruh shi bun kiwei ki jingujor kiba ngi la dep ujor ha kine ki sngi bala dep”.
“Ngi la pynpaw ba kum ki Khun ki Hajar ka Hima Langrin da lei lei ruh ngim lah ban pdiang ba u Nongtei Sing Syiemiong un long biang u Syiem ba pura jong ka Hima jong ngi” ula ong.
U samla Wadladkyrpang ula iathuh ba haka jingialang u CEM ula ong ba ka Executive Committee ia mynta kam lah ban ai kano kano ka rai namar ka dang donkam ban pule bniah iaki File bad iaki jingujor daki khun ka Hima pyrshah ia u Syiem Nongtei Sing Syiemiong. “Haka jingialang bad u CEM ngi la pynsngew ba lada ka EC kam lah ban weng ia u Nongtei Sing Syiemiong hapoh 15 sngi naka liang ka jong ngi ngin wan biang hangne ban shah thngan tad haduh baka Executive Committee kan ai ia ngi ka jubab kaba shai” ula ong.
Peit ruh:
“Ki don shibun ki lynti, ngin sa peit kaei ba ngin leh, lada u paidbah u ong ngin thiah hangne ban ioh iaka rai, ngin wan biang hapoh 15 sngi ban thiah tad haduh baka KHADC ka ai iaka jubab ha ngi u khun u hajar ka Hima Langrin” ula bynrap.
