Nongpoh, Nohprah 30:  Da ka jingsarong ka Shnong Saiden ha Ri Bhoi District ba hap ha ka Hima 12 Lyngdoh bad ka shnong kaba don harud ka surokbah National Highway ha Ri Bhoi ka la lah ban rakhe lehkmen ia ka jingdap 125 snem ka jingiaid lynti ka shnong naduh ba la suit la shor ia kane ka shnong ha u snem 1900 ba kane ka Shnong ka dei kawei na ka Shnong kaba la kiew bha ha ki kam pynroi bad ruh ha ka pule ka puthi.

La sdang ruh ban rakhe naduh ka por mynstep ia kane ka jinglehkmen ka jingdap 125 snem ka shnong da ka jingshim bynta naduh ki Heprit, ki samla bad kynthup ki Longkmie ki Longkpa lyngba ki jingialehkai bapher bapher ban pynphuh pynphieng ha kane ka sngi kyrpang jong ka shnong.

La wan ruh ban shim bynta ha kane ka sngi da u MLA ka Umsning u Dr. Celestine Lyngdoh kum u kongsan bad la sakhi lang ruh da ka jingdon lang u Bah B Nongmalieh Rangbah Shnong ka Mawtnum, Bah EJ Myrthong Rangbah Shnong Saiden, u Bah M.G Kharshanlor, u Dr HJ Syiemlieh, Bah SL Wahlang Notary Officer ka D&SJ Nongpoh, ka kong RB Lyngwa District Sericulture Officer bad kiwei kiwei ki riew rangbah jong ka shnong.

Lyngba jong kane ka sngi, la ioh ruh ban plie paidbah ia u maw sah jingkynmaw ka jingdap 125 snem ka Shnong Saiden ba la pynieng hakhmat ka ïing Dorbar bad la plie paidbah ruh ia ki kam pynroi naduh ka VIP Gallery bad ka surok shnong ha madan Saiden bala aiti sha ka Shnong da u MLA ka Umsning u Dr. Celestine Lyngdoh bad ruh la pynlait paidbah ka Souvenir da u kongsan lem bad ki riew rangbah.

Ha kane ka sngi, kum ka jingburom ia u Rangbah Shnong u Bah E.K Lapang uba la khlad dang shen, kiba dei halor ki jingialam lynti ban kyntiew ia kane ka shnong la pynlong ruh ia ka jingsngap jar kaba shim init bad ryngkat ka jingpynkup burom ia kiba haing utei u rangbah uba la noh synniang shisha ia ka shnong Saiden ha ka jingialam jong u kum u Rangbah Shnong.

Ha kane ka jingdap 125 snem ka shnong, ka Dorbar shnong ka la pynkup burom ruh ia ki nongialam shnong barim bad ki nongialam kiba bat ia ka kam haduh mynta ryngkat ia ki Sala pule kiba wan shakhmat ha ki jingpule bapher bapher kiba la wan rah nam wan rah burom ia ka shnong.

Haba kren ruh ha kane ka sngi kum u kongsan, u Dr C Lyngdoh kum u MLA ka thain, u la pynpaw ia ka mynsiem jong ka jingkmen ban ia shim bynta lang ha kane ka jingrakhe dap 125 snem ka Shnong Saiden bad ha kajuh ka por ruh u pynpaw ia ka jingkmen ba kane ka shnong ka dei kawei na ka Shnong ha Ri Bhoi District kaba la kiew bha ha ki liang baroh.

Shuh shuh, u la pynpaw ruh ba kum u MLA u don ia kata ka jingieit kaba kyrpang ia kane ka shnon bad ka daw kaba u don kata ka jingieit kyrpang ka dei namar ba kane ka shnong ka pynnmih ia kita ki nongialam kiba don ka jingkitkhlieh bad kiba trei borbah ban kyntiew ia ka shnong  ka thaw ha ki liang baroh.