Shillong, Naitung 07: U Myntri ka tnat Tourism u Bah Paul Lyngdoh u la ong ba ka Ïingbishar Meghalaya High Court kala pynskhem ïaka jingthmu jong ka Sorkar ban pynkynriah ïaki nongdie jingdie madan naki surok Khyndai Lad shaki jaka bala ithuh daka Sorkar.
Haba kren shaki lad pathai khubor u Bah Paul u la kam baka tnat Shillong Municipal Board (SMB) kala biang pura ki nongtrei ban pynthikna ba ka jing pynkynriah ïaki nongdie jingdie madan na Khyndai Lad kan ïaid beit ïaid ryntih.
U Bah Paul u la ong ba haka 22 tarik Naitung ka Sorkar ka kyrmen ba baroh ki nongdie jingdie madan kin kohnguh ïaka jingbthah ka Sorkar ban kynriah noh shaki jaka bala pynkhreh ban bteng ïaka kam die jingdie.
“Hadien bala pynkynriah lut ïa baroh ki nongdie jingdie madan naki surok Khyndai Lad, ka Sorkar kan pynitynnad bad kan pynbna ïa kane ka thain kum ka jaka ïaid kjat (Pedestrian Zone) bad tang kito kiba sah ha kato ka thain kin ioh ban ïaid kali kata ruh ïaka por yn sa pynbeit hadien” la ong u Bah Paul Lyngdoh.
