Nongpoh, Risaw 03: Ban dang ai ka jingpynshai sha ki paidbah halor ka jingkordor ka khuid ka suba ba kum ka sorkar pdeng lyngba ka Swachhta Hi Seva ka buh ia ka thong ban wan rah ia ka khuid ka suba, ka opis u Deputy Commissioner ka Ri Bhoi mynta ka sngi u la pynlong ia ka prokram kaba kyrapng ha Nongpoh Town Shopping Complex shi bynta halor ka ka thong jong ka khuid ka suba.

U MLA ka Nongpoh u Bah Mayral Born Syiem u la wan ban shim bynta ha kane ka prokram kum u kongsan bad la sakhi lang ruh da ka jingdon kang Kong B. Ranee, ADC ka Ri Bhoi, ki ophisar sorkra, ki nongialam Shnong lem bad ki khynnah skul na ki skul bapher bapher ka thaiñ Nongpoh.

Kum ban pynkynmaw, kane ka prokram ka dei kaba la sdang naduh ka 17 tarik u Nailur 2025 ba la pynlong da ka ophis u Deputy Commissioner ka Ri Bhoi halor ka jingpynshai shaphang ka khuid ka suba bad ha kane ka prokram la don ruh ki jingiakop bapher bapher kum ka jingaiop dro, ka jingiakop toh sloagan, bad mynta ba la pynkut pat ka don ka jingiakop pule Poetry da ki samla pule.

Na ka liang ka ophis u Deputy Commissioner ka la pynshlur ia ki samla kiba la jop ha ki jingiakop bapher bapher lyngba ki khusnam bad ki syrnod kum ka dak ka jingpynshlur ba ki samla ki dei ba don ia kata ka jingkitkhlieh ban pynneh pynsah ia ka khuid ka suba.

Haba kren ruh ha kane ka sngi kum u kongsan, u Bah Mayral Born Syiem u la ai ka jingkhublei ia ka ophis u deputy commissioner bad kiwei ki tnad ophis sorkar kiba don bynta ha kane ka prokram, namar ban ai jingpynshai halor ka khuid ka suba ka long kaba donkam ba kum ki paidbah kin don lang kata ka jingkitkhlieh ban wan rah ia kata ka khuid ka suba.

U la ong ruh ban kren halor ka jinglehkhuid leh suba, ngi dei ban sngewthuh ba kam dei ban don kano kano ka jingpynbor, hynrei kum kita ki nongshong shnong ngi dei hi ban don kata ka jingkitkhlieh shimet shimet. Dei tang lada ngi don kataka jingkitkhlieh shimet shimet ngi lah ban poi sha ka thong jong ka sorkar ban pynlong ia ka jylal bad ka ri kaba khuid ba suba, u la ong.

Shuh shuh, u la ong ruh haba ia kren ia ka khuid ka suba, kum u MLA u la buddien ruh ia ki kam pynro kiba ia dei bad ka Nongph Water Greater Supply Scheme kaba 101 klur, ha kaba lada lah ban pyntreikam hok ia kane ka projek ngin lah ban wan rah ia ka khuid ka suba naduh na ing na sem bad shabar, ha kaba ka um ka long shisa ka jingdonkam ha baroh ki liang haba kren shaphang kata ka khuid ka suba, u la bynrap.