Nongpoh, Nailar 14: Ka jingleit kynthih u Samla sha ka wah Umtrew kam dei sat na ka jingbeh ki paidbah halor ka kam tuh mobile, hynrei dei ka jingiaknieh pisa hadien ba la dep die ia ka Mobile ba ki la dep tuh bad ha ka jingiaknieh pisa para ma ki, la don ki paralok jong u, kiba ym hun ki la beh ia u ban pan pisa bad ha ka jingtieng u la leit ban kynthih sha katei ka wah.
Ia kane la phla da kiba haïing utei u khynnah ba la tip kyrteng kum u Wanphrangsngi Syiemlieh, 27 snem ka rta haba kren sha ki lad pathai khubor mynta ka sngi ha ka jingiawad ia utei u khynnah ha katei ka wah Umtrew kaba don ha Byrnihat.
Kumba la iathuh da kiba haïing, la ong ba ki dei ki paralok kiba ia dih drok lang bad hadien ba la dep ban die ia ka Mobile kaba ki ia tuh lang, la mih ka jingbym sngewthuh jingmut ha ka por ba sam ia ka pisa bad na ka jingbym hun ia ka pisa ba la ia sam ki la thmu shoh thmu dat utei u samla uba la phet noh ia lade bad ha ka jingbeh jongki ia u, da ka jingtieng u la kynthih noh sha katei ka wah.
Shuh shuh, la ong ruh ba kane ka jingiaknieh pisa ruh ka dei tang na ka daw ka T. 300 ba kim iahun, ha kaba une u samla u la phet bad kitei kiwei pat ki kynhun ki la ia beh ia u ban shoh ban dat bad ha ka jingtieng u la leit kynthih sha katei ka wah.
Halor kane ka jingjia, ka kynhun SRT, Fire & Emergency Service ryngkat ki bor Pulit ka Byrnihat mynta ka sngi ki dang bteng ban wan ia utei u samla na katei ka wah bad haduh mynta kim pat lap satia la u la ngam jyllop ne u dang lait im hadien ba la kynthih ha katei ka wah.
