Shillong, Ïaîong 08: Ba la ktah jur bad ba la ban shisha ka jingduk jingkyrduh na ka jingkhang tih dewiong ka sorkar ha Rilum Jaintia bad wat ha ka jylla, kiba bun ki nongïalam, ki nongmihkhmat, ki longkmie longkpa  ki la pynpaw ba ka jingkhang ban tih dewiong ka la ktah shisha ïa kiba bun balang bad ka buh jingma ruh wat ban mih ka tuh ka thiem haba ban ka duk ka kyrduh.

Ïa kane la pynpaw da ki longkmie, ki nongïalam paidbah bad ki  nongmihkhmat paidbah ka rilum Jaintia ha ka rally bad ka jingïalang paidbah ba la pynlong da ka Jaintia Coal Miner And Dealer Association hynnin ka sngi ha Khliehriat, East Jaintia Hills.

Nalor ki riew paidbah kiba la wan kyrshan ha kane ka rally bad jingïalang paidbah, kiwei kiwei kiba la don lang ki kynthup ïa u Deputy CEM ka JHADC u bah Lasky Rymbai, u Dr. Sankey Shangpung (MDC, JHADC), u Wailadameshwa Siangshai (MDC, JHADC), legal adviser u bahvKerlang Ksoo, Krison Langstang (MDC, JHADC), u MP barim u bah Vincent H. Pala, bad kiwei kiwei.

Kiba la ai jingkren ha kane ka sngi ki kynthup ïa u Bah Joinlywell Pyrtuh (Adviser), Kerlang Ksoo (Legal Adviser), General Secretary Samanbha Syrpuh, Secretary Synjuk Waheh Shnong, Leningstar Rymbai, Hambertus Nongtdu, Nidamon Chullet, Ïaineh Sutnga, JNC President Sambormi Lyngdoh lem bad kiwei.

Kitei ki nongïalam haba kren ki la pynpaw  a la donkam pakat ban ailad noh ban tih dewiong lyngba kata ka jingstad saïan ka ban nym ktah pat ïa ki trai muluk ki trai jaka ba don par dewiong bad lada ailad ban tih dewiong ruh dei ban ailad lang ïa baroh kiba don par dewiong.

Ki sur ki paidbah ba la mih na kane ka rally ruh ka dei ka jingjynjar ki paidbah na ka jingshah khang tih dewiong, namar naduh ba la khang dewiong ka la ktah lut ïa baroh ki paidbah ba la ban ka duk ka kyrduh bad  ym tang ïa ki trai par dewiong kiba shah ktha, ha kaba ki la kyrpad jur ia ka sorkar ban pyntreikam noh ïa kata ka ‘Scientific mining’ ka ban long ka jingkyrlhu ïa ki bad ym kata ka jingshah teh shah khum halor ka hok long trai man trai ïa ki par dewiong.