Nongpoh, Naitung 15: Ki lai ngut ki heprit ki la duh noh ia la ka jingim mynta ka sngi, kaba dei hadien ka jingshah bat ha ka bording ilektrik ha ka Shnong Umtangling ba hap ha ka Umiam Police Station ha ka thain Umroi ha Ri Bhoi District.
Kane ka jingjia ka la jia mynta ka sngi ha ka por 2 baje ei ei ha katei ka shnong Umtangling, kaba dei na ka daw ka jingdkut bad hap u Sainar Ilektrik 11 KV ha ka surok ba ki iaid bad ha ka jingbym tip ne iohi ia u sainar ki la iaid na katei ka lynti bad shah bat syndon ha ka bording ilektrik.
Haba ioh ban ia kren lyngba ka phone bad u Rangbah Shnong ka Umtangling, u Bah Bok Nongbsap u la ong ba kane ka jingjia ka dei kaba ym poi pyrkhat ba kitei ki khynnah ha ka jingbym tip ba hap utei u sainar ilektri ki la leit sha katei ka jaka bad khlem poi pyrkhat ki la shah bat syndon ha ka bording ilektrik haduh ba la duh syndon ia la ka jingim.
U la ong ruh napdeng kitei ki 3 ngut kiba la khlad noh ha ka jingshah bat bording ilektrik, u heprit ba 11 snem bad 12 snem ka rta ki dei shi para.
Haba kren halor kane ka jingjia, u Bah Bok Nongbsap kum u Rangbah Shnong u la iathuh ba shwa kane ka jingjia ba sngewsih kan jia, u la dep ban leit ujor sha ka tnad MeECL ba la don ki sainar kiba la jan dkut ha katei ka shnong bad ruh ba la sniew u transformer ba ki la shong dum la shi taiew ei ei, hynrei na ka liang ka tnad MeECL kam shym la shim khia satia.
Sa peit ruh:
Shuh shuh, u la iathuh ba kane ka jaka ba dkut u sainar ka dei kham haneng jong ka jaka ba la jan dkut u sainar, ha kaba mynta ka sngi khlem poi pyrkhat ba kitei ki heprit kin duh noh ia la ka jingim, namar ba kim tip satia ba la dkut u sainar ha kaba tang mar ia poi ha katei ka jaka ki la shah bat ha ka bording ilektrik haduh ba kin da duh syndon ia la ka jingim ha katei ka jaka, u la bynrap.
Halor kane ka jingjia, ki Bor pulit bad na ka tnad MeECL ruh ki la wan poi mardor sha katei ka jaka ban leh ia kaba donkam bad kumba long haduh mynta ym pat tip satia la kin leh ia ka Postmortem examination ha kaba la ong ba ki bahaing ki pyrshang ban phah pynlait na ka postmortem examination.
