Nongpoh, Naitung 15: Ka lympung ïalehkai basketball jong ki samla kaba la tip kum ka State Youth Basketball Championship 2026 bala pynlong da ka Ri-Bhoi Dsitrict Basketball Association haka jingïatreilang bad ka Meghalaya Basketball Association kala sdang mynta ka sngi ha Nongpoh, bad ha kane ka lympung kumba 7 tylli ki kynhun na kylleng ka jylla kynthei bad shynrang kila wan ban shim bynta shitrhem kaba yn sa pynlong haki ar jaka ba kynthup ïaka madan basketball jong ka Alpha English Higher Secondary School bad ka St Paul’s Higher Secondary School, Nongpoh.
Ïa ka jingïalang plie pyrda ïa kane lympung la pynlong mynta ka sngi ha Alpha English Higher Secondary School ha kaba u Bah Mayral Born Syiem MLA ka Nongpoh u la shimbynta kum u kongsan haka jingdonlang ka kong Rona Khymdeit kum ka symbud kongsan, ki nongïalam ka Ri-Bhoi District Basketball Association (RBDBA) ba kynthup ïa u Bah Johny Lee Lamare President, u Bah B Marbaniang General Secretary bad kiwei kiwei ki riew rangbah bad nongkitkam ka RBDBA.
Pule ruh:Ka Ri-Bhoi kala kiew shaphrang ong u DC haka jingïalang bad u Myntri sorkar pdeng ha NESAC
Haba phai sha ka jingïakhun plie pyrda ha kane ka sngi kala long hapdeng ka Ri-Bhoi District Basketball Association, pyrshah ïaka St. Anthony’s School, Shillong ha kaba ka jinglehkai ka long kaba shongshit bad itynnad da ka jingtbit jong ki rang ïalehkai bad hapdeng ka jingïakhun kaba jur ka St. Anthony’s School Shillong kala pynliem noh ïaka Ri-Bhoi District Basketball Association da 59-51 basket.
Peit ruh:
Haba kren ha kane ka sngi naka liang u Bah Mayral Born Syiem bad ka kong Rona Khymdeit kila pynpaw ka jingsngewkmen ïaka sienjam bala shim da ka Ri-Bhoi District Basketball Association ban pynlong kum kane ka lympung ban sei ïaka sap ka phong ki khun samla ha kane ka jinglehkai khamtam shuwa ka jingpynkhreh ïaka National Games ka ban sa long ha kane ka jylla ryngkat ka jingkyrmen skhem ba napdeng kine ki rang bad ki thei ïalehkai ki ban shim bynta ha kane ka lympung kin sa don kiba kynsai ki ban sa shah jied ban mihkhmat naka jylla ban aireng pat bad kiwei ki jylla ka ri India ha katei ka lympung ba heh jong ka ri.
