Mairang, July 17: Kumba ju leh man la u snem, ka Hima Nonkhlaw mynta ka 17 tarik u Naitung 2026 ka la pynlong ia ka jingrakhe ia ka lyngkhuh sngi iap ba 191 sem u Tirot Sing Syiem kum u khlawait ka ri bad ruh ka la pynkut iaka jingrakhe ia ka jingdap 500 snem ka Hima Nongkhlaw ba la pynlong ha madan Mot Tirot Mission Mairang.
U Bah Metbah Lyngdoh kum u Myntri ka tnad Power bad Water Resources ka sorkar jylla, u la wan ban shim bynta ha kane ka sngi kum u kongsan bad la don ryngkat lang ruh ka DC ka Kong Anitar Kharpor, u SP u Bah G. Lyngdoh, U ADC u bah M.Diengdoh, u MDC ka Mairang u Bah Equator Nongrang, u Prof Nehu u Dr.D.R.L.Nonglait, u syiem khynnah ka hima Nongkhlaw u paiem K.M Syiemlieh bad kynthupnaduh ki Myntri ka Hima Nongkhaqw, ki riew rangbah, ki khynanh skul bad ki piadbah nongshong shnong.
Ha kane ka sngi, ka Hima Nongkhlaw ka la lah ruh ban pynlait paidbah ia ka Souvenir, kaba dei ka kot kaba thoh shaphang ka Hima Nongkhlaw bad la pynkup burom ruh ia kito kiba don bynta ban iarap thoh ia kane ka Souvenir.
Pule ruh: Ba hiar dor u Jhur Kubi haduh 2 tyngka shi kilo, hap sam paidbah ki nongrep ha Shillong
Haba kren ha kane ka sngi kum u kongsan, u Bah Metbah Lyngdoh u la pynpaw ia ka jingkmen ban ioh shim bynta lang ha kane ka sngi bad ka dei ruh ka sngi lehkmen ban sah jingkynmaw ha ka pateng ban sa wan ka Hima Nongkhlaw kaba la jam sha ki 500 snem ka jingiaid lynti kum ka Hima bad kaba dei ruh kawei na ka hima kaba paw bad kaba la rim tam ha ka jylla.
U la ong ruh ha ki 500 snem ba la leit noh, shibun ki syiem ki leit ki wan ba la kot haduh 20 ngut ki syiem ba pura bad 5 ngut ki dei ki Acting Syiem.
Peit ruh:
“U Tirot Sing Syiem u dei u syiem uba mih na kane ka hima bad ka ing syiem ka dang bat ia kata ka bynta ban synshar katkum ki lynti ba dei ban leh. Kane ka hima ka dang lait na ka jingshah tuklar na ki bor kiba na shabar, namar ka dei kata ka Hima kaba khlain bad kaba ia tylli” ong u Bah Metbah, bad bynrap da kaba ong, “Katba dang don ki Syiem bad ki Hima ka dang don beit ka jingithuh ia ka jaid bynriew jongngi ba ngim dei ban duh jingkyrmen,” u la bynrap.
Lyngba jong ka sngi, ka long ruh ka jingkmen ia ka Hima Nongkhlaw, ha kaba u Bah Metbah Lyngdoh kum u MLA ka Constituency u la kular ban ai T. 5 lak sha ka Hima ban iarap ne tynrong lem halor ka jingpynkhreh ia kane ka jingrakhe dap 500 snem ka Hima Nongkhlaw.
