SAHKUT LUT KI KALI PAIDBAH HA SUROK NH-6 HA LUMSHNONG BA TWA KHYNDEW, SHIM KHIA KI BOR BA DEI PEIT BAD LA IAID BEIT KI KALI PAIDBAH.

East Jaintia, Jylliew 15: Na ka daw ka jingther u lapbah ba jur mynta ka step kiba bun ki nongleit nongwan ki la sahkut ha ka surok bah National Highway-6 ba hap ha East Jaintia Hills ha ki bynta jong ka Lumshong hajan Toll Plaza, kaba dei na ka jingtwa khyndew bad ka jingtuid ka umsaw kaba la pynjot ia katei ka suorkbah.
Kane ka dei ka surok ba iaid na Guwhati sha Silchar lyngba ka jylla Meghalaya na Jaintia Hills jong ka jylla Meghalaya bad mynta ka step ki paidbah nongleit nongwan ki la kynduh mawsiang na ka daw ka jingtwa khyndew bad tuid ka umsaw sha ka surokbah ba ki kali ba iaid ba ieng ki hap ban sangeh bad sahkut ha katei ka surokbah.
Kum ban pynkynmaw, kane kajuk ka surok ruh dang shen ki paidbah ki mat ia kajuh ka jingeh ha ka leit ka wan na ka daw ka jingtwa khyndew kaba la pynjot ia katei ka surokbah bad mynta ka step ruh ki paidbah ki la hap ban mad ia kajuh ka jingeh kaba la hap ban sangeh shuwa shipor ban iaid na katei ka surok kaba la wan rah ka jingdheng kali na ka daw ka jingtwa khyndew bad ka jingjot ka surok kaba la ktah na ka jingtuid ka umsaw sha ka surok.
Haba wad jingtip halor kane ka jingjia, u Heh Pulit ka East Jaintia, u Giri Prasad u la iathuh ba ka la don shisha ka jingdheng kali, kaba dei na ka daw ka jingtwa khyndew bad maw ha katei ka surok kaba ktah ruh na ka jingtwa khyndew bad ka umsaw kaba la tuid sha ka surok bad bun ki paidbah ba lei tba wan lyngba kane ka surok ki la sahkut namar ba hap ban maramot ne pynbha ia katei ka bynta ba la twa khyndew jong ka surok.
Shuh shuh, u la pyntip ruh kumba long haduh mynta na ka daw ka jingtrei shitom ki bor ba dei peit ryngkat ki bor pulit, la lah ban maramot noh ia katei ka surok kaba jot bad ki paidbah ba leit ba wan ki la ioh lad ban iaid biang lyngba katei ka surok.