Guwahati, Jylliew 15: Da ka jingthmu ban nang pynjanai bad pynkylla ia ki rukom treikam ban wanrah ia ka jingkhuid jingsuba hapoh ki jaka sorbah jong ka nongbah Guwahati, na ka liang ki bor ka Guwahati Municipal Corporation, ki la wanrah da ki buit treikam ba thymmai bad kata ban pyndonkam noh da ki kali electric ban kit ia ki nuit ki nier ha ki jaka sor lyngba ka State of Art Waste Management.
U Mayor ka Guwahati u Mrigen Sarania u la pynlait paidbah ia ki 2 tylli ki kali kit nuit kiba yn pyndonkam katkum ka juk ba mynta kiba don ruh ia ki synsar ba kyrpang ban pynkhuid ia ki jaka sor ha Guwahati bad ruh la pynlait haduh 60 tylli ki kali rit ba la tip kum ki e Light Motor Vehicles (E-LCVs) na ka bynta ban leit lum ia ki nuit ki nier bad ki jakhlia naman kawei pa kawei ka thliew iing.
Kane ka jingpyntreikam kaba thymmai da ka GMC, kan dei ruh ka sien kaba nyngkong eh hapoh ka ri India hi baroh kawei ban sdang pyndonkam da ki buit ba thymmai ban wanrah ia ka jingkhuid jingsuba ha ki jaka sor ka nongbah Guwahati ha Assam.
Ki kali kiba don ia ki tiar katkum ka juk ba mynta khamtam ban sar ia ki jaka sor la thied ia ki ha ka jinglut kaba la long kumba 5.87 klur tyngka, katba ki 60 tylli ki kali rit e-LCVs la thied ha ka dor ba la kot 6.69 klur tyngka.
Ka jingthmu jong ki bor ka GMC ban wanrah ia kane ka rukom treikam ban pynkhuid ia ki jaka sor ha Guwahati ka long ruh da ka thong ban pynduna noh ruh wat ia ka jingjaboh ha ka lyer (Air Polution). Kum kawei ka Sor bah Guwahati kaba kitkhlieh bha ha kaba ia dei bad ka jingiada na ka jingjakhlia (Pollution) khamtam ka jingdonkam ban wanrah ia ka jingkhuid ha ka lyer ring mynsiem (non-attainment city) hapoh ka National Clean Air Proggrame bad ka jingsdang pyndonkam ka GMC ia kine ki kali ban iaid da ki bor electric ka dei ka sienjam kaba kyrpang tam ban iakhuid ia ka jingjakhlia jong ka sorbah Guwahati.
YN PYNTREIKAM KA GUWAHATI MUNICIPAL CORPORATION DA KI KALI ELEKTRIK BAN KIT IA KI NUIT HA KI JAKA SOR GUWAHATI
