Nongpoh, Nohprah 30: U Temjen Imna Along, uba dei u Myntri ka tnat ki kam jngohkai pyrthei bad uba dei ruh u Myntri ka tnat Pule puthi jong ka jylla Nagaland, mynta ka sngi, u la wan ban iuhkjat ha shnong Upper Balian, Byrnihat, kata ka long ban iashimbynta ha ka prokram rakhe ia ka lyngkhuh sngikha ba 101 jong u Atal Bihari Vajpayee, uba dei u Myntri Rangbah barim ka India.

Ia katei ka prokram la pynlong da ka BJP Jirang Mandal, ha kaba nalor ka jingdon u Temjen Imna Along, la sakhi ruh da ka jingdon u Rigman G.Momin, u President ka State BJP, u Himanta Timung, State President BJP (ST), u Bah Sen Thabah, President BJP Ri Bhoi, u Bah Albertus Lapang, President BJP Jirang Mandal, u PS Toor lem, ki riew rangbah lem bad da ki spah ngut ki paidbah jong ka thain Byrnihat.

Haba kren halor katei ka jingshah khot ban iadon bynta ha katei ka jingrakhe ia ka sngikha ba 101 u Atal Bihari Vajpayee, na ka liang u Temjen Imna Along, u la pynpaw ba u kmen eh ba u la ioh ban iashimbynta ha katei ka sngi bad kaba dei ruh ka jingshisha ba dei ban kynmaw kyrpang ia ka sngikha, namar u dei u riew khraw jong ka ri hi baroh kawei.

Ha ka jingkren jong utei u Myntri sorkar ka jylla Nagaland, u la ong ruh ba ha ki por ba u Atal Bihari Vajpayee, u dang long kum u Myntri Rangbah ha ka ri, u la lah ban leh bad pynioh ia shibun ki kam pynroi, kiba long ka jingmyntoi ia baroh ki paid nongshong shnong ha India bad khamtam eh na bynta ka jingmyntoi jong ki paidbah kiba sah ha ki jylla shatei lammihngi ka ri India.