Nongpoh, Nohprah 30: Uwei u samla uba dang 20 snem ka rta bad uba dei u nongtrei ka Pine Club ha Jorabat, u la khlad noh na sla pyrthei bad kata ka dei ba u la shah bat ha ka bording Ilektri, hadien ba u la leit kum ktah ia u Transformer 11KV ba don ha katei ka Pine Club.

Katkum ka jingtip ba la iohlum, la ong ba katei ka jingjia, ka la jia hynne ka step sngi ba-ar ha ka por 4 baje eiei mynstep, ha kaba la suba jur ba utei u samla, u la kum leit ktah ia u Transformer, kaba la pynlong ia u ba un shah bat ha ka bording Iletrik bad u la khlad noh hashen haduh ba un da ingkhong hi khait.

Une u samla ba dang 20 snem ka rta, u dei uba la tip kum u Ezan Thapa 20 snem ka rta na Nepal.

La lap bad tip halor ka jingshah bat bording utei u samla, ka dei ha ka por 4 baje eiei mynstep, kata ba la don ka jinglip bording ha katei ka jaka, ha kaba ki nongtrei ka Pine Club ki la pyntip sha ki briew ka MeECL halor katei ka jinglip bording, hynrei haba la wan ki nongtrei ka MEeCL Byrnihat ha ka por 10 baje mynstep, la lap pynban ia ka met utei u samla bad kaba la ingkhong khait bad thiah hajan u Transformer, kaba la pynsuba jur ba u shah bat ha ka bording Ilektrik.

Haba iadei bad katei ka jingjia, la pyntip noh sha ki Pulit ka Byrnihat Police Outpost bad na ka liang ki Pulit ruh ki la leit ban shimti ia katei ka Met bad la rah noh sha Civil Hospital Nongpoh, na bynta ban leh ia ka Postmortem.