Nongpoh, Nailar 31: Uwei u nongñiah thuk thuk bad uba shong nadien ki la mynsaw jur mynta ka sngi, kaba dei hadien ba ka Thuk Thuk kaba ki shong bad ba ym pat don number ka la kylla kynsan bad ki la her kynsan sha shiliang ka surok kaba dei lyngba ka jingpynher sted palat ia katei ka thuk thuk.
Kane ka jingjia ka la jia mynta ka sngi u Blei ha ka por 2 baje tam ei ei ha Umran Dairy, ha kaba katei ka Thuk thuk ka dang wan na Mawlai ban leit sha Nongpoh bad hadien ba la poi ha katei ka jaka ka la kylla kynsan ha kaba kitei ki ar ngut ki la her syndon sha shiliang ka surok haduh ba la mynsaw jur.
Une u nongñiah thuk thuk ba la mynsaw la tip kyrteng kum u Wanniang Kharakor, 27 snem ka rta na Mawlai Nongkwar bad uba shong nadien pat la tip kyrteng kum u Teiborlang Kurbah, 37 snem ka rta uba dei hi na Mawlai Nongkwar, Shillong.
Katkum ka khubor ba la ioh lum na ki Pulit, la ong ba ha kane ka jingjia baroh ar ngut ki la mynsaw jur bad la rah noh mardor ia ki sha Umsning CHC ban ioh ia ka jingsumar bad katkum ka kaiphod na ki Doctor la lap ruh ba kitei ki ar ngut ki la buaid bad la shoh u khawiang. Na ka liang ki Pulit ki dang pynlong ia ka jingtohkit kaba bniah bad ruh ban leh katkum ki kyndon jogn ka aiñ.
