Ha kawei ka jingjia aksiden, kawei ka Alto kaba don ïa u Registration Number ML 05 W 5094 kala rung ha khrum jong kawei ka trok dang step phyrngap haduh ba 3 ngut ki briew ba shong ha katei ka alto kila mynsaw jur.
Kane ka jingjia kala jia hynne ka step phyrngap haka por kumba 5:40 eiei ha kaba katei ka kali Alto ka dang mih naka thaiñ Jaintia Hills ban leit sha Guwahati hynrei haba poi haka shnong Umdihar naka jingbymlah tehlakam jong u draibar katei ka alto kala leit ban rung ha khrum jong kawei ka trok kit mar jot kaba dang ieng harud surok ha Umdhihar kaba don ïa u number AS 01 DD 9728.
Kitei ki ba mynsaw la tip kyrteng kum u Kynrong Dkhar ba dei ruh u nongñiah jong katei ka kali Alto, Khailang Dkhar bad u Rep Dkhar bad baroh kidei na Wapung East Jaintia Hills District.
Ki pulit jong ka Nongpoh Traffic mar sien ioh jingtip halor katei ka jingjia kila leit mar mar sha katei ka jaka ban sei ïaka met jong kitei ki 3 ngut bala mynsaw jur bad sahkut hapoh kali ryngkat ka jingïarap lang jong ki paidbah bad namar ka jingmynsaw kaba jur la pynkit noh sha Super Care Hospital Shillong, bad ka jingtohkit halor katei ka jingjia ka dang ïaid shakhmat.
