Resubelapra, Risaw 23: Ka kynhun ki myntri sorkar ka sorkar Meghalaya, ba la lamkhmat da u Myntri rangbah ka jylla, u Conrad K. Sangma mynta ka sngi ki la pynlong da ka jingiakynduh ba krypang ha Resubelpara, North Garo Hills, na ka bynta ba ia thir na ia tai halor shibun ki mat ba ka sorkar ka thmu ban pyntreikam bad ban pynlong ain.
Ki mat ne ki phang ba la ia kren mynta ka sngi bad ba la mynjur da ka kynhun ki myntri sorkar ka Meghalaya ki kynthup ba ka kynhun ka la mynjur ia ka Meghalaya Private Medical Institution (regulation of admission, fixation of fees and reservation) Ordinance, 2024 bad ka Meghalaya Medical College Regulation and Admission into MBBS course, 2024. Kane ka kynhun ka la rai ban pynlong ain (Ordinance) bad kin dang ia kynduh biang na ka bynta ban thung noh da kata ka Regulatory Body.
Kane ka rai ka kynhun ki myntri ban pynlong ain (Ordinance) bad ba ki la ai ka jingmynjur kan treikam ne long ain hadien ba u Lat ka jylla un ai ia ka muhor ne ka jingmynjur.
Ka Regulatory Committee kan sa ai ka jingpyntip bad ruh ka jingmang ia ki jingsiew, ban pyntreikam ia ka bhah bad ruh ban bhah ia ki jaka pule katkum ki kyndon ka sorkar bad ruh katkum ka jingpyniaid ki ingkashari kinsa pyntreikam.
Ka USTM (PA Sangma Medical College) kin pyntreikam noh shen hadien ba la soi ia ka Ordinance da u Lat ka jylla bad ruh ban sa pyntip paidbah.
Kawei pat ka mat ba la mynjur da kane ka kynhun myntri ka long ban peit ban khmih bha ia ka jingai wai ing, ka jingbhah ia ki quarter ka sorkar, ban pyntreikam ia ka Rental Housing scheme na ka bynta ki nongtrei sorkar ka jylla Meghalaya. Kane kan iarap ruh ia ka tnad Housing ba kan peit bniah ia ka jingdon jingem jong ki bad ruh ki jingdonkam ha ki quarter sorkar.
Kawei kaba ki la ia kren ne mynjur ruh ka dei ban pynsynjor ia kiba la heh ka rta naka bynta kiba trei kum ki nonghikai SSA na ka bynta ka jingthungkam ha ki Govt. LP, UP, Secondary bad Higher Secondary. Ka sorkar ka la pynsynjor ia ka rta na ka bynta ki nonghikai SSA ba ka rta wad kam jon gki kan long haduh 45 snem kum kita ki ba trei ha ka SSA bad ki lah ruh ban wad kam wad jam ha kino kino ki examination thungka ba la pynban da ka sorar Meghalaya.
Shuh shuh, ha kane ka sngi, kawei naka mat kiba la ai jingmynjur ki kynthup ban shim ram na ka Asian Development Bank na ka bynta ban pyntreikam ia ki kam pynroi bapher bapher (Project), kaba long ka jingkyrshan ban mang tyngka ia ka sorkar Meghalaya ha ka Phase – II. 90 % ka ram yn mang sha ka jylal ban siew da ka sorkar kmie bad 10% ka ram ba shim pat kan sa siew da ka sorkar jylla.
