Nongpoh, Naitung 29: Ha kawei na ka jingjia, u wei u rangbah ba la tip kyrteng kum u Bah Dlas Shadap ha ka rta kaba 41 snem bad uba dei u kurim ka Kong Ïuniki Bamon na ka shnong Umshangktad ha Ri Bhoi District u la shah bom shah tied ha phyllaw ïing hapoh ka phyllaw ïing haduh ba la lynkien ka snam bad ym tip briew shuh bad na kane ka jingshah bom shah tied u la mynsaw jur na ki bynta jong ka khlieh bad ka shadem jong u.
Kumba la ioh lum jingtip, la iathuh ba kane ka jingjia ka la jia naduh ka 26 tarik u Naitung 2025, ba une u rangbah u la shah bom shah tied haduh ba la mynsaw jur bad la lap pat da ka kurim jong u, ka Kong ïuniki Bamon ha ka por 4 baje mynstep bad kaba kham sngewphylla ba ka kurim jong u kam shym la ioh sngew satia da kaba kam ba ka la ioh thiah bad kane ka jingjia pat ka jia ha phyllaw ïing jongka.
Kumba la iathuh da ka kurim une u rangbah ba la shah bom sha thied, ka la ïathuh ba ha katei ka miet u kurim jongka u la buaid bad la don ruh kiba wan buh ia u ha kaba la don lang u hymmen jongka ha kaba u la pan ja bad hadien kata u la kynroi kylla ia ka bad ka la leit thiah noh na ka daw ka jingsam thiah palat jongka.
Ka la iathruh ba halor katei ka jingjia ba u kurim u la shah bom shah shoh haduh ban da mynsaw kam don jingtip shuh bad kam shym la ioh sngew ei ei , hynrei dei tad haduh mynstep ba ka la khia thiah ha ka por 4 baje ka la iohi pynban ia u lok uba la thiah lyngktar ha phyllaw hapdeng ka jinglyngkien ka snam.
Kane ka kurim jong u, ka la iathuh ruh ba ha ki por ba la leit noh ka la ju don ruh ka iashoh ia dat bad ka kmie jongka ba kum ka ïing ka sem kim hun satia ia ka jingiapoi kha poi man jongki.
Haba ia kren bad u Bah Plas Shadap, uba dei u para trai une u rangbah ba la mysnaw, u la iathuh ba kum ka ing ka sem ki la ioh jingtip ha ka janiet jong ka 26 tarik kata ka dei ha ka sngi Saitjain ha ka por 5 baje ei eiba la pyntip da u khtaw jong une utei u hymmen u la mynsaw bad ym tip briew shuh bad halor kane ka jingjia kum u para u la pyntip noh mar mar sha ki Pulit ka Mawlasnai Police Outpost bad ba la pynkit noh ia u sha CHC Bhoirymbong bad na ka daw ka jingmynsaw jur la rah noh ia u NEIGRIHMS ban ioh ia ka jingsumar kaba paka na ka daw ka jingmynsaw jur ki bynta jong ka khlieh bad ka shadem.
Kum ka ing ka sem halor kane ka jingjia, ki la dawa na ki bor pulit ba kin tohkit bniah ban kem ia kiba don kti ha kane ka kam ban pynmynsaw ia u Bah Dlas Shadap khnang ba kum kine ki jingjia kin nym jia shuh bad ba ki runar kiba thmu ban shim wat ia ka jingim briew kin nym lait na ki kyndon jong ka aiñ.
Shuh shuh, u la iathuh ruh ba kane ka jingshah bom shah tied u hymmen ka dei ka jingdusmon ha kaba u la hap ban shah sumar ha ICU ka NEIGRIHMS ha kaba haduh mynta u don hapdeng ka jingbym tip briew bad na ka liang ka ing ka sem ki la dep ruh ban ujor da ka ejehar ha Mawlasnai Police Outpost ba ki bor pulit kin leh ïa kaba donkam katkum ki kyndon jong ka ain.
