Nongpoh, Naitung 30: Ka long shisha ka jingkyrkhu kaba khraw ia kiba bun tylli ki shnong ba hap ha ka Mawhati Constituency ha kaba naduh ba la ioh ia la ka jylla ki paidbah ki la shah iehnoh bein ha ka liang ka surok, hynrei mynta ka kynti ha ka jinglong nongmihkhmat u Bah Charles Marngar, ka jingkyrkhu ka la wan ha kaba kitei ki shnong ba shen yn sa siang rong noh ia ki ar tylli ki surok.
Kitei ki 2 tylli ki surok ban sa siang rong noh lyngba ka skim PMGSY, phase-04 ki kynthup ia ka surok ba pyniasoh na Umlapher sha Lymphuid ha ka jingjngai kaba 15 km bad kawei pat ka kaba pyniasoh na Pamlatar sha Mawlaho ha ka jingjngai kaba 8 km. kine ki ar tylli ki surok shen ka sorkar kan sdang noh ban pyntreikam.
Na ka liang u Bah Charles Marngar kum u MLA ka thaiñ, ha ka 29 tarik u Naitung u la lum da ka jingialang kaba kyrpang kata naduh ki nongialam shnong, ki khlieh nongsynshar, ki Contractor bad ruh ki ophisar na ka tnad PWD Umsning Division ban ia kren pynbeit ia kane ka kam, khnang ba kan nym don kano kano ka jingpynthud ha kaba pyntrei ia kane ka surok kaba u paidbah u la angnud la bun phew snem mynta naduh ba ioh ia la ka jylla.
Ki khlieh nongsynshar shnong haba kren halor kane ka bynta, ki la pynpaw shisha ka jingsngewgnguh ia u MLA ka Mawhati, u Bah Charles Marngar, namar dei ha kane ka jinglong nongmihkhmat jongu, ba kane ka jingpohsniew ki paidbah ka la urlong noh mynta hadien da ki phew tylli ki snem.
Na ka liang u Bah Charles Marngar, kum u nongmihkhmat ka Mawhati, u la pynpaw ka jingsngewnguh kaba khraw ia ka Sorkar Jylla kaba la sngap ia ka jingkyrpad ka jong u ban pynioh ia kine ki artylli ki surok bad kiwei ki surok ba la pynmang lyngba ka Scheme PMGSY bad u la iathuh ruh ba ia kine artylli ki Surok la thmu ban pyndep hapoh u bnai Lber jong u Snem 2026.
