Khliehriat, Naitung 31: Wat la bun naki seng bhalang bad ki paidbah kiba pyrshah mynta ka sngi ia ka Public Hearing ka Company Shree Cement Private Limited haduh ba la mih ki huri hura halor ka jingthmu ban buh ia ka Limestone plant da katei ka Company, hynrei ki bor synshar District bad ki bor sorkar ki la lah ban pyniaid beit pyniaid ryntih ia katei ka Public Hearing kaba la pynlong ha Lum Syrman.
La sakhi ruh mynta ka sngi naduh ka por 5 baje mynstep shuwa ba sdang katei ka Public Hearing ka la mih ka huri hura bad ka jingiapynibor hapdeng ki kynhun ba kyrshan bad kito ki kynhun ba pyrshah ia ka public hearing haduh ba la poi sha u pud ka jingtih thliew ban khanglad ia kiba pyrshah, ka jingpynjulor ia ki Kali bad la don ruh kiba la mynsaw tang na ka jingdon kane ka Public Hearing.
Kumba la sakhi, kane ka jinghuri hura kam dei kaba la jia ha ka jaka ba pynlong ia ka Public Hearing, hynrei ha ka surok ban leit sha katei ka jaka ba la mih kata ka jingiatai bad ka jingiapynbor hapdeng ki ar kynhun.
Wat la don kine ki kynrum ki kynram shwa ban sdang ia kane ka pubic hearing, hynrei ki bor sysnhar District ki la pyniaid beit ia katei ka public hearing ha kaba la don ryngkat naduh u Additional Deputy Commissioner u Bah A. Nongbri, u Doloi ka Elaka Nongkhlieh, u waheh shnong ka Tongseng Nongkhlie, u Environmental Engineering u Bah Y.F Laloo lem bad kito ki nongshong shnong kiba kyrshan ia katei katei ka Public hearing.
La sakhi ruh kiba bun hi na kitei kiba ioh shim bynta ha ka public hearing ki la pynpaw ba ki ai ka jingkyrshan ia ka Shree Cement ha katei ka public hearing bad ka mat kaba hakhmat eh kaba ki la pynpaw ka dei ka jingiohkam ioh jam ki nongshong shnong.
Peit ruh:
Kumba la paw ba wat la kane ka pubic hearing ka la iaid beit iaid ryntih bad ym lah ban tip bniah pat la kito kiba pyrshah ki ioh lad neem ban paw ia ki nongrim jongki, namar kumba la pynpaw naduh mynstep kito kiba pyrshah ia ka Shree Cement la kynnoh ba kim ioh lad ban leit shim bynta ha katei ka Public Hearing bad la kynnoh ruh ba la shu pyniaid da ka bor bad pdiang tang kito kiba kyrshan ia ka Public Hearing.
