Nongstoin, Naitung 31: Ha kawei na ka jingjia ba sngewsih, ki ar ngut shi kurim na ka shnong Porsohsat ba hap ha Nongstoin Police Station ki la shah bom shah shoh haduh ba la mynsaw jur, ha ki runar kiba ym pat lah ban tip satia bad la kynnoh ba kitei ki runar ki la bom la shoh da ki kynja tiar ba nep haduh ba kitei ki 2 ngut ki la mynsaw jur.
Kumba la ioh lum jingtip, kane ka jingjia ka la jia ha ka por 2 baje mynstep ha kaba u kpa ba la tip kyrteng kum u Elbin Kharbani (60) bad ka Kong Seldaris Kharsyntiew (68) ki la shah bom shah shoh ha ka ïingsah jongki bad ki Bor pulie ka Nongstoin Police Station ki la ioh jingtip halor kane ka jingjia ka dei ruh hadien ba la pyntip da uwei u Nongshong shnong katei ka shnong.
Ha kane ka jingjia, la iathuh ruh ba ka khun khatduh jong kitei ki 2 ngut ba shah bom shah shoh ruh ka la jah rngai na la ïing bad ym pat tip shaei ka la poi ne jah.
La iathuh ruh ba ia kine ki 2 ngut ki ba la mynsaw la rah noh sha Civil Hospital Nongstoin ba utei u rangbah u la mynsaw jur na ka khlieh bad don hapdeng ka jingbym tip briew bad katei ka longkmie pat ka la mynsaw ki dang shah pynmynsaw bad la rah noh sha Shillong ban ioh ia ka jingsumar kaba kham paka.
La ong ruh tang hapdeng ki khyndait por, Ki pulit ki la pyntip ba utei u rangbah ba la tip kyrteng kum u Elbin Kharbani u la khlad noh na ka daw ka jingjur ka jingmynsaw.
Peit ruh:
Halor kane ka jingjia, Ki Pulit ki la dep ruh ban register case bad pynlong ruh ia ka jingtohkit ban ioh kem ia kito kiba don kti bad kumba long haduh mynta kito ki runar ba don kti ha kane ka kam ki dang phet rieh ia lade.
