Nongpoh, Naitung 12: Kum shi bynta ban kyntiew ïa ki kam rep Tit bad ban myntoi ki nongrep Tit, u Dr. Anupam Mishra, Vice Chancellor ka Central Agricultural University, Imphal ha ka 10 tarik u Naitung 2025 u la pynlait paidbah bad plie ïa kawei ka Mobile Application ba la tip kum ka ‘Mushroom Mentor Mobile Application’ ha College of Postgraduate Studies in Agriculture Science (CAU), Umiam.
Kane ka mobile application la ai kyrteng ‘Mushroom Mentor’ ha kaba la pynwan dur ne saindur da ka jingïatrei lang ka CPGS-AS bad ka National Institute of Technology (NIT), Meghalaya, kaba dei ruh ka bynta ka jingwad bniah halor ka kam rep Tit ba la pynlong ïa ka jingwad bniah da ka College of Postgraduate Studies in Agriculture Science, CAU, Umiam.
Kane ka Mushroom mentor ne Mushroom app lyngba ka Amazon bad Google Play Store, kaba dei kaba la shna kyrpang ha ka jingïalam lynti bad saindur da u Prof. Dwipendra Thakuria, Dean, CPGSAS, Umiam. Kane ka App ka ai ka jingtip kaba bniah halor bun jaid ki Tit, ka rukom rep ne pynmih ïa ki Tit ba la pyndonkam da ki kor ki bor ka juk mynta, ka jingtip halor ka jaid jingtei met ki Tit, ki lad jingïarap na ka sorkar, ka rukom shet ïa ki Tit bad ruh ka ïarap ban pynithuh ïa ki jaid Tit bapher bapher tang da ki dur ki dar jong ki Tit.
Kane ka application app, ka dei ruh ka jingtrei shitom bad ka jingwad bniah ka Ms. Bhanita Baruah, PhD Scholar ha ka jingïalam u Dr. L. Devrani, Professor, CPGSAS, Umiam, Dr. PNM Rani, Assistant Professor (Computer Science), CPGSAS, Umiam bad Dr. Bunil kumar Balabantary, Assistant Professor, NIT, Meghalaya.
Ha kane ka sngi ba la plie ne pynlait paidbah ïa kane ka Mushroom mobile application app la don ryngkat ruh u Prof. P. Mahanta, Director, NIT, Meghalaya; Prof. Ram Singh, Dean, College of Agriculture, Kyrdemkullai; Dr. B. Balabantary, Assistant Professor, NIT, Meghalaya; Shri. Kitborlang Kharpran, Assistant Director of Horticulture, Mushroom Development Centre, Upper Shillong lem bad kiwei kiwei de.
