Shillong, Lber 25: Ka Federation of Khasi Jaiñtia and Garo People (FKJGP) da ka jingkmen pdiang sngewbha ïa ka rai jong ka Garo Hills Autonomous District Council’s (GHADC) ban khang syndon ïa ki bym dei ki riewlum ban ïa khun ne thep vote ha ka election ka GHADC, da kaba pynpaw ba kane ka dei ka histori ban ïada kyrpang ïa ki jaid bynriew riewlum ha Garo Hills bad kyrpad jur ruh ïa ki 2 tylli ki District Council ha Khasi-Jaintia ba ki dei ban pyntreikam kumba la leh da ka GHADC.

Ha ka kyrwoh ba la pynlait ha hynnin ka sngi Baar jong ka taiew, u President ka FKJGP u Bah Dundee Cliff Khongsit, u la ai khublei kaba kyrpang ïa ka GHADC bad ïa baroh ki dkhot jongka kiba la shim ïa kajuh ka sur bad ka rai ban mynjur na ka bynta ban khanglad ïa ki bym dei ki riewlum ban ïakhun ne thep vote ha ka election ka GHADC.

“Ka FKJGP ka ai khublei kyrpang ïa baroh ki MDC ka GHADC, kiba ïa tylli lang da kajuh ka sur bad shim ruh ïa kajuh ka rai ban khanglad ïa ki bym dei ki riewlum ban ïa khun election ne ban thep vote ha kane ka election MDC ha GHADC, kaba dei ruh ka hok ba la pynkhamti ïa ki riewlum lyngba riti synshar ka ri lyngba ka Sixth Schedule” ong u Bah Khongsit.

U la ong ruh ba ka seng ka ai khublei kyrpagn ruh ïa ka sorkar Meghalaya bad ïa u Lat ka jylla u CH Vijayashankar kiba la pdiang ïa ka rai jong ka GHADC, kaba dei ruh hadien ba la mih ka jingïakhih kaba jur bad ka jingïakynad ha rilum Garo.

Haba phai ruh sha ka Khasi Hills Autonomous District Council (KHADC) bad ka Jaintia Hills Autonomous District Council (JHADC), ka FKJGP ka la kyrpad ruh ïa kine ki Council ba ki de ba shim khia kumjuh ban khanglad ïa ki bym dei ki riewlum ban nioh ban shim bynta ha ka election MDC ka KHADC bad JHADC.

“Ka por ka la ih bha ba ka KHADC bad JHADC ruh kin shim ïa kane kajuh ka sienjam kumba la leh da ka GHADC, na ka bynta ban ai ka jingïada kaba kyrpang ïa ka hok ki riewlum bad ruh ban khanglad ïa ki bym de ki riewlum kiba pyrshang ban knieh ïa ka hok bad ka riti ka dustur ki riewlum” ong u Bah Khongsit.

U la kren ruh halor ka jingma na ka jingbym lah ban pynkhlaiñ ïa ka aiñ ban ïada ïa ki trai muluk ki trai jaka, kane ka lah ban ïalam ba ki riewlum barit paid kin sa shah thombor ha ki heh paid bad ba ki bym dei ki riewlum ne ki heh paid kin thombor lyngba ki kam khaïi pateng ha kaba lada ki ioh lad lei lei ban don ha ka kam synshar kane ka buh jingma ïa ka lawei jong ki trai muluk ki trai jaka, u la ong.

U la bynrap ruh da kaba ong, ba ka FKJGP ka kyrmen skhem ba ka sorkar jylla bad u Lat ka jylla kin shim ïa ka jingkitkhlieh kaba hakhmat eh ban ïada ïa ka hok ki trai muluk ki trai jaka ha ka jylla Meghalaya. U la ai khublei ruh ïa ki nongïalam ka FKJGP na rilum Garo Hills ba la ïalam da u President u Pritam Arengh bad kiwei kiwei ki seng kiba la shim khia bha ïa kane ka mat bad ai khublei ruh ïa ka jingïatylli ki paid Garo ba ka jingangnud u paidbah ka la urlong ban ioh ïa kata ka jingïada kaba paka ïa ki trai muluk ki trai jaka ha rilum Garo.

Shuh shuh, ha kawei ka bynta, U Bah Khongsit ong ruh ba ka FKJGP ka khot ka wer ruh ïa ka KHADC bad JHADC ba ki dei ban khot noh da ka dorbar kypang ban pynkylla ïa ka AD Rule bad ban ban jur ruh ba ym dei ban ailad ïa ki bym dei ki riewlum ban thombor ïa ka hok jong ki trai muluk ki trai jaka, u la bynrap.