Nongpoh, Risaw 11: Ka Khasi Student Union, North Khasi Hills Unit ka la mih shakhmat ruh ban pynpaw ia ka jingdonkam ki samla pule wad kam wad jam ban don noh kata ka Examination Centre ka MPSC ha Ri Bhoi khnang ban ioh jingmyntoi ki samla pule na Ri Bhoi.

Kane ka jingpynpaw ka KSU  North Khasi Hills District Unit ban don noh katei ka examination centre, ka dei hadien ba hynnin ka sngi ki la wan ban kynduh ia u Deputy Commissioner ka Ri Bhoi u Abhilash Baranwal ban aiti ruh ia ka dorkhas halor shibun ki mat ba la buh da ka KSU ha kiba ia dei ruh bad ki lad ioh kam ioh jam ki khun samla ka District.

Haba ia kren bad u General Secretary ka KSU North Khasi Hills District Unit u samla James H. Mawphniang u la ong nalor kiwei kiwei ki mat ba la buh jingdawa halor ka lad ban ioh kam ioh jam ki samla na Ri Bhoi, ka Examination Centre ka dei kawei na ka mat ba hakhmat ba ka seng ka kyrpad na ka MPSC ban buh noh kawei ka Centre ha Ri Bhoi.

U la ong ruh ba ka seng ka la pynsngew ruh halor ki jingthep kam thep jam kum ha ki post DSC ba ki dei ban phai khmat shwa sha ki samla trai district bad ruh ban pynlong ka jingthung kam kaba khuid ba suba khlem da don kano kano ka jingleh shiliang ha ryngkat ban pynsted noh ia ka examination DSC ha Ri Bhoi bad ruh ban buh da ki Video recorder ha ka personal interview.

Shuh shuh, u la ong ruh nalor ka jingkyrpad ban khuid ka thungkam thungjam, ka KSU ka dawa ruh ban don ka examination centre jong ka MPSC ha Nongpoh, ka long ban pynsuk bad ban ai jingmyntoi ia ki khun samla ka District ba kim donkam shuh ban leit sha Nongbah Shillong ba ka jingjngai ka la kot da ki phew spha kilomitre.