Shillong, Jylliew 10: U nongïalam ka BJP bad Myntri barim ka Sorkar Jylla, u A.L. Hek, ha ka sngi Balang u la ong ba kano kano ka rai halor ka jingpyntreikam ïa ka Inner Line Permit (ILP) lane ka Meghalaya Residents Safety and Security Act (MRSSA) ha Meghalaya ka dei ban long katkum ka jinglah ban pyntreikam, da kaba buh hakhmat ïa ka jingmyntoi jong ki nongshong shnong bad ki nongwan jngohkai pyrthei.
U Hek u la ong ba ka jingïakren halor kine ki mat kam dei shuh tang ka jingdawa, hynrei ka dei ban long halor ka jingbishar bniah ïa kaei kaba lah ban pyntreikam ha ka jylla.
“Ha kaba ïadei bad ka jingïakren halor ka ILP bad MRSSA, nga kyrpad ïa ka Sorkar Meghalaya bad ïa ki paidbah ka jylla ba haba ngi kwah ban pyntreikam ïa kine ki aiñ, ngi dei nyngkong ban peit ïa kaei kaba lah ban leh bad kaei kaba ym lah ban leh,” la ong u Hek.
U la ban jur ruh ba ka thong ka dei ban wad ïa ka rukom treikam kaba lah ban ïada ïa ka jylla Meghalaya khlem da ktah pat ïa kito kiba wan sha ka jylla bad kiba noh synniang ha ka ïoh ka kot jong ka jylla.
“Ka bynta kaba lah ban pyntreikam ka dei ban ai jingmyntoi ym tang ïa ki paidbah Meghalaya hynrei ïa baroh. Ngi dei ban peit nyngkong ïa ka jingmyntoi bad ka jingshngain jong ki briew ka jylla bad kumjuh ruh ïa ka jingshngain bad ka jingmyntoi jong kito kiba wan sha Meghalaya, khamtam eh ki nongjngohkai pyrthei,” u la ong.
U MLA u la ban jur ba ka donkam ban leh ïa ka jingwad bniah kaba pura shwa ban wanrah ïa kum kine ki aiñ, khnang ban lait na kino kino ki jingktah ïa ka jylla kaba rit paid kum ka Meghalaya bad ruh ïa ki briew kiba wan rung sha ka jylla.
Sa peit ruh
