U Myntri Rangbah ka Ri, u Narendra Modi u la pynbna ba yn siew mar 2 lakh tyngka sha baroh kito kiba la khlad noh ïaka jingjia aksiden hapdeng ar tylli ki rel mynta ka sngi ha West Bengal.
Naka liang u Narendra Modi u la pynbna ba ïa katei ka pisa kaba 2 lakh yn siew lyngba ka Prime Minister National Relief Fund bad yn ai sha ka longiing jong uwei pa uwei ba khlad na katei ka jingjia aksiden, bad 50 hajar naka bynta kiba mynsaw.
Haba pynpaw ruh haka rynsan X, naka liang Modi u la pynpaw ka jingsngewsih halor katei ka jingjia bad phah ruh ka kyrwoh sngewlem sha baroh kiba la duh noh ïa kiba ieid ba thoiñ na katei ka jingjia, ryngkat ki jingduwai ba kin ioh ïaka jingpyntngen.
U la pynpaw ruh ba u Myntri ka tnad Railway, u Ashwin Vaishnaw u la don ha lynti ban leit jngoh ïa ka jaka ba jia katei ka jingjia.
Kum ban shu pynpaw halor katei ka jingjia kawei ka rel kaba dang mih na New Jalpaiguri ban leit sha Sealdah jongka nongbah Kolkata, ka Kanchanjunga Express, ka la shah tynrah noh na ki bynta ba shadien ha kawei pat ka rel kit mar ha ki bynta jong ka Phansidewa, Darjeeling District jong ka jylla West Bengal mynta ka step jong ka 17 tarik u Jylliew, 2024, bad tad haduh ban thoh ïa kane ka khubor kumba 15 ngut ki briew kila duh noh ïala ka jingim.
Shuh shuh naka liang u Myntri ka tnad Railway, u Ashwin Vaishnaw u la pynbna ba ka sorkar kan ai mar 10 lakh naka bynta kiba ïap bad 2.5 lakh sha kiba mynsaw jur bad 50 hajar sha kiba mynsaw malu mala.
PYNBNA U MODI 2 LAKH SHA KIBA KHLAD NAKA JING AKSIDEN KI REL HA WEST BENGAL
