Shillong, Jylliew 15:
U Bah Sainkupar Nongtraw, General Secretary jong ka seng kieng atiar ba la shah khein beain ha ka sorkar, ka Hynniewtrep National Liberation Council (HNLC) ha u kyrwoh khubor ba la pyllait mynta ka sngi, u la pyntip ba ki lai ngut ki dkhot jong ka seng kiba la shah kem ha ki pulit ka Ri Bhoi ha kine ki khyndiat sngi ba lah dep, kidei kiba na ki thain Block-II, ka thain kaba ka sorkar Assam na ka por sha ka por ka ju wan kyntur pud beain bad thaw jingkynad.
U la iathuh ruh ba ki dak ki shin jong katei ka jingthombor ki bor sorkar ka jylla Assam ia ki Khasi kiba sah ha kitei ki thain ki kynthup naduh ka jingshah pynjot jong ki jingthung jingtep, ka jingkhrong pisa beain da ka tnad Forest ka jylla Assam ia ki mar rep kiba pynmih na kitei ki thain bad ka jingkhrong pisa beain da ki seng kieng atiar jong ki lehnoh na katei ka jylla. U la iathuh ruh ba kine ki jingjia shah ban bein jong ki paradoh parasnam ka la pynlong ia ka seng HNLC ba kan buh ia ki briew ha kitei ki thain, kum shi bynta ban iada ia ki nongshong shnong. Hynrei ka jingshah kem noh ka jongki ha ki pulit, ka long kaba sngewsih naba kan buh jingeh kaba khraw ia kitei ki nongshong shnong ka Block-II, la bynrap u Bah Sainkupar Nongtraw.
U tei u nongialam ka HNLC u la ong ruh ba bunsien haba ka tnad pulit ka ju ioh ban kem ia ki dkhot jong ka seng, ka ju pynsaphriang ruh ryngkat ki khubor ban kynnoh ba kidei ki nonglute, ki nongleh kam sniew, hynrei ka leh bym tip pat iala ka kam sniew bad kam tuh kam thiem kaba la leh da ki briew ki jongka tnad ha ki kyrdan bapher bapher, kiba u la kynnoh kum kita ki ‘riew bamsap bad runar kiba phong iaka uniphorm’ kiba iuh roit ia ka hok longbriew manbriew jong ka jaitbynriew. U la bynrap ruh ba ka jingphla jong uwei na pulit ophisar, u Bah GK Iangrai halor ka jingjyllei ka bamsap hapoh ka tnad pulit, kadei kaba la pyn-i-shai, ba la donkam ban wanrah jingkylla bad jingtreikam kaba khuid.
Ka jaidbynriew ka jongngi kadei kaba shah leh shilliang khmat ha kijuh ki briew kiba dei ban pyntreikam hok iaki, la ong u Bah Sainkupar Nongtraw da kaba kdew ia ka jingshah shoh, shah byrngem, bad jingpyndait ksew ki pulit ka Pyrdiwah ia u Bah Solin Suting (70), tang namar ka jingtharai ba udei u nong Bangladesh. U la ong ruh ba ka long kaba sngewsih bad kaba kyndit ban iohi ba wat ia u riew tymmen ruh la leh ha kane ka rukom. U la ong ruh ba lada ki bar jylla ki leh kam sniew bad shah kem, ki bor pulit ki leh isynei iaki ban pyniabha bad ban pynjah ia ak mutkotduma kaba long mar khongpong lada dei ia ki jaidbynriew Khasi da kaba bynrap ba kane ka kdew shai ia jingiadei ba narieh jong ki Inglieh Ingsaw bad ka Political Home Department jong ka jylla Meghalaya.
U Bah Sainkupar Nongtraw u la kren siat ruh ia u Bah Prestone Tynsong da kaba ong ba ka seng ka sngewtynnad ba u myntri ki kam poh ing ka jylla u la khot iakren iasuk, hynrei ka seng kam lah pat ban pdiang iaki rukom kren ki jong u ha ki kyrwoh khubor bad bynrap ‘Ngi la iakhun pyrshah ia ka ri bad ka sorkar jongphi mynta da ki phew snem, sngewbha wat nym khein poh ia iangi. Ngi sngewthuh ia ka jinglong shalak jong ki ‘riew sain hima sima; wat thmu pat ban pynbiej iangi. Ngim dei shuh ki briew kiba dang duna ka jingshemphang ba phin lah ban phah shad katba phi mon, da kaba kular ban ai eiei, katba ynda lah dep shad pat phi khlem ai eiei’.
