U Donald Trump, President barim jong ka America, u la lait thaw naka jingïap hadien ba ki runar kila thmu ban siat iap ïa u haka ha pdeng ka jingialap elekshon hynnin ka sngi Saitjain ha Pennsylvania. U Trump u la shah tan noh mardor naka jaka ïeng jong u hadien ka jingriew jong ki kuli, ha kaba ka shkor jong u ka la tap da ka snam, ha ka jingialang elekshon jong u ha shwa ka elekshon president jong ka US jong u snem 2024.
Ki pulit bad tnad syntiat lem bad ki ophisar ïalap elekshon jong u kila mareh mardor sha jaka ba kren u Donald Trump bad ker sawdong ïa u bad rah sha kawei pat ka jaka ba shngaiñ, bad hapdeng ka jingkhah ka snam u kuli u la dei haki bynta ba shajrong jong ka shkor ka mon jong u bad lait thaw naka jingïap, katba uwei u briew ba don marjan ha katei ka jaka u la mynsaw jur.
Ka tyllong khubor ka ïathuh ruh ba ka dei ka jingpyrshang kaba nyngkong eh ban pyniap ia u president ne u kyrtong president naduh ba u Ronald Reagan u la shah siat ha u snem 1981 bad kane ka wan ruh tang 4 bnai hadien ba u Trump u la shah jied ban long u kyrtong ba pura jong ka seng Republican.
Ki heh sorkar ki la pynthikna ba hadien hadien ka jingshah siat u Trump ha ki dkhot jong ka kynhun ïaleh pyrshah jong ka U.S. kaba don ki tiar ïaleh kiba heh, uwei u runar ba thmu pynïap ïa u Trump u la shah siat iap noh.
Shuh shuh halor katei ka jingshah thombor u Donald Trump la pynrem ruh da ki nongialam ka ri US naduh u President Joe Biden, ka vice president ka Kamala Harris bad ki president barim, u Barack Obama, u George W Bush bad u Bill Clinton bad kiwei kiwei.
