Pynshai U President BJP Ri Bhoi Halor Ka Jingiehnoh Kam U Bah Blessedson Dkhar

Nongpoh, Nailur 19: U President ka BJP Ri Bhoi District u Bah Sen Thabah u la pynshai kylla halor ka jingiehnoh kam u Bah Blessedson Dkhar da kaba kam kum u general Secretary ka BJP ha Ri Bhoi, hynrei ha ka jingshisha um pat dei u General Secretary ba pura ka BJP Ri Bhoi bad wat ïa ka appointment letter ruh ym pat ai satia ïa u.

U la pynshai ruh ba ka BJP Ri Bhoi kam pat shym la beh kam ïa u bad dei ma u hi uba la iehkam da kaba kynnoh kylla ïa ka party ba kum ka party ruh kan nym lah ban bat haba u la mih hi da lade.

Halor ka jingkynnoh ba weng ïa u na ka Whatsapp Group, u Bah Thabah u la pynshai ba ka party kan nym lah ban pdiang ba un shu wan rah ïa kino kino ki kam kiba dei ki kam shimet bad ki kam rim jong u.

Shuh shuh, u la pynshai ruh ba u Bah Blessedson Dkhar u dei uba ju leh marwei marwei ïa ka kam khlem da pyntip ïa ka party bad nalor kata ruh um ju kohnguh ïa ki jingbtah ka party kaba um don kata ka jingburom mar kylliang para nongïalam bad la dep ruh ban btah ba un pyndep ïa ka enrollment ban long kum u active member ka BJP, hynrei ïa kata ruh u kyntait bad haoid la jied ïa u ban long u general Secretary ka BJP bad ka party kam pat ai ka appointment letter namar ba um ju burom ïa ki kyndon treikam ka party, u la bynrap.