Jowai, Jylliew 24: Ioh bat ki pulit jong ka ANTF ia kawei ka kali shimet (Hyundai Venue) ka ba kit ia u droks mynta ka sngi, ha kaba ki pulit ki dang pynlong ia ka nakka checking ha Umtyra katkum ka jingbthah da u Officer ka Meghalaya Police Service u Shri Bidhan Bhattacharjee ryngkat u Deputy Superintendent of Police jong ka Khliehriat.
Hakane ka kali shimet la don 2 ngut ki rangbah bad kawei ka samla kynthei, ba la tip kyrteng ia ki kum u Sahin Hussain Laskar na ka shnong Nagdirgram Cachar, Assam, U Rofiqul Alom Laskar na ka shnong Harsinghpur Nagdirgram Cachar Assam bad ka Mamta Sinha, Simgiri Chibitabicha Cachar Assam. Kane ka kali kaba dang thmu ban leit sha Khliehriat bad ki pulit ka ANTF ki la ioh kem noh ia kine ki nongkhaii beain ia u droks, kane ka kali kaba la don ia u register number (AS-01-EJ-8977).
Shuh shuh ki bor pulit haba ki la don ka jingtohkit bha iakine ki nongkhaii beain, ki la iathuh ba ki dang thmu ban leit sha Khliehriat ban pynpoi ia u drok ha kawei pat ka nongkhaii ka ba la tip kyrteng ka Maya Gwala. Hadien katto katne por kane ruh ka Maya Gwala ka la shah kem noh ha ki pulit jong ka Khliehriat.
Katkum ka ingioh jingtip, Ki pulit ka ANTF ki la lap naka kane ka kali kumba 15 tylii ki synduk sabon ba la thep da u droks uba don 164.99 grams bad 3 tylli ki mobile phone. Ha kaba iadei bad kane jingioh kem ia ki nongkhaii drok ki bor pulit jong ka Station Khliehriat kin nang pynlong ka jingtohkit bniah sha khmat.
KEM KI PULIT ANTF IA 2 NGUT KI SHYNRANG BAD KAWEI KA KYNTHEI HALOR KA JINGKYNNOH SHALAN DROK HA EJHD
