Nongpoh, Nohprah 01: Hadien ka jing kynnoh treikam beaiñ jong kawei ka karkhana jri kaba la tip kum ka Resource Rubber Pvt. Ltd. kaba don haka shnong Mawsmai 11 Mile ha Ri-Bhoi District ïa kaba la long trai da uwei u bar jylla u Rohit Kapoor khlem da don ïaki kot ki sla kiba biang, ka seng Hynñiewtrep National Youth Front, Northern Region hapoh ka jingïalam u Bah Hesting Lyngdoh President, Bah Alfred Mallai General Secretary haka jingdonlang u Bah Barna Manih Vice President ka sengkmie, lem bad ki dkhot mynta ka sngi kila leit ban khang tala syndon ïa katei ka karkhana bad kam bit shuh ban plie khlem da pynbiang ïaki kot ki sla.

Haba kren sha ki lad pathai khubor naka liang kitei ki nongïalam ka seng kila ong ba hadien ka jingioh jingtip kaba thikna ba katei ka karkhana ka treikam khlem ki kot ki sla kiba biang naduh ki trading license, kum ka seng kala hiar mynta ka sngi ban leit khang tala beit namar haba ki bar jylla ki wan ban leh ïaka kam khaii pateng ha kane ka jylla ki hap ban ioh ïaki trading license hynrei kumba la ioh jingtip katei ka karkhana mynta la kumba 2 snem kam lah ban pynbiang ïaki kot ki sla hynrei la shu pynïaid beaiñ beit ïaki kam.

Ki nongïalam ka seng kila ong ruh kaba sngew lyngngoh ka long ba kumno ka District Council kam nud ban leh eiei ne ban leit khang ïa katei ka karkhana haba la tip shai ba kam don ki kot ki sla kiba biang, bad naka liang u trai u la pyrshang ruh ban leit wad hynrei ka District Council kam shym la ai shuh, hynrei haduh mynta katei ka karkhana ka dang treikam bad ïaid shaid shaid, namar ym lah ban tip ba katei ka jaka ka lah ruh ban don ki kam sniew nalor ka kum ka seng kala ioh jingtip ruh ba katei ka jaka kaba la pynïaid ïa katei ka karkhana ka don hapdeng ka jingkynad.

Lah ruh ban kdew hangne ba katei ka karkhana ka dei kaba la shah khang tala bunsien nakadaw ka jingbym lah ban pynbiang ïaki kot ki sla, ka jingkynad jaka bad kiwei kiwei, bad bun ki kynhun seng bhalang kila ju leit khynra hynrei katei ka karkhana haduh mynta ka dang treikam beit.