Nongpoh, Naiwieng 27: U Sosthenes Sohtun, Myntri sorkar jylla bad uba dei peit ia ka C&RD, GAD bad SAD, ha ryngkat ka jingsynran ki ophisar na ka tnat PWD Building, ki la leit ban jurip ia kawei ka Building ba ka sorkar jylla ka dang shu dep thied thymmai ha Bangalore, ia kaba ka sorkar ka thmu ban pynlong kum ka Meghalaya House bad nalorkata, la leit ruh ban jurip ia kawei ka jaka ha Mumbai, ba ka sorkar ka don jingthmu ban thied bad ban tei sa kawei pat ka Meghalaya House ha Mumbai.
Ha kitei ki sngi, ba u Bah Sosthenes Sohtun, u la leit jurip ha Bangalore bad Mumbai, la synran ia u da ka jingdon u Bah M. Nongpluh, Superintending Engineer PWD Building, ki nongtrei ha Meghalaya House lem bad kiwei.
Haba kren hadien ba la dep katei ka jingjurip, u Bah Sosthenes Sohtun, u la ong ba ka thong jong ka sorkar hi ka long ba ka kwah ban pynbiang shuh shuh ia ki jingdonkam ha ki Meghalaya House, khnang ban suk ki briew na Meghalaya haba ki leit sah sha kitei ki jylla, kata la ka long kiba leit shah sumar, kiba leit pule bad kiwei leit donkam shimet bad kiba kwah ban sah ha Meghalaya House.
Shuh shuh, u la ong ba haba iadei bad ka Building ba ka sorkar ka dang shu dep thied ha Bangalore, kan sa long kaba ai jingmyntoi na bynta ki samla jong ka jylla, kata naduh kiba leit pule, leit Interview ne kine kino ki kam ha Bangalore.
Katba haba iadei bad ka jingleit jurip ia ka jaka ba ka sorkar ka thmu ban thied ha Mumbai, ka dei hadien ba ka sorkar ka lap ba ka Meghalaya House kaba don mynta ha Mumbai, ka dei kaba la khapngiah, namar bun ki briew na Meghalaya kiba leit shah sumar ne leit donkam sha Mumbai ki la khapngiah palat ban sah ha ka Meghalaya House kaba mynta.
“Kumba ka long mynta, ka jaka ba ka sorkar Meghalaya ka thmu ban thied ha Mumbai, ka dang don ka jingiakren bad ka sorkar Maharashtra, ha kaba na ka liang ka tnat GAD jong ka sorkar jylla, kan sa phah jingthoh sha ka sorkar Maharashtra, na bynta ban ioh ia ka dor kaba kham biang, khhang ba ka sorkar Meghalaya kan lah ban tei biang sa kawei ka Meghalaya House ha Mumbai.