Nongpoh, Jylliew 16: “Ka jinglen lada jong u Biswal Paul Makri (Bam Kwai ha Dwar u Blei) uba la khlad hashen hadien ba u la shah siat ha ki Pulit CRPF ha ka 17 tarik u snem 1987 ha Motphran, kam shym la long lehnoh ei, namar dei lyngba ka jinglenlade jong u, ka la pynkhih win ia ka Bri u Hynniewtrep hi baroh kawei ha kito ki por, kaba la pynlong ba kin sa beh naphang ia baroh ki mynder ri bad ba ngi sa shngain kumba long mynta, watla ngim lah ban beh lut ia ki” ong u Samla Donald V. Thabah.
Kitei ki kyntien na utei u nongialam ka KSU Sengkmie, ka dei ha ka sngi ba ka KSU Umsning Circle, ka la pyllait paidbah ia ka kali kit nongpang bad kaba dei ruh ka sngi, ba ka KSU ka rakhe ia ka lyngkhuh sngi iap ba 38 snem jong u Biswal Paul Makri, uba dei na ka shnong Umrit, Ri Bhoi Sepngi bad uba pule ha Nongbah Shillong.
Lyngba jong katei ka sngi, u Samla Donald V. Thabah, u la batai lyngkot ruh halor ka jingshah thombor ki Khasi ha kito ki snem, ha kaba u la ong ba ha kito ki por, ki mynder ri ki la sdang ban pynibor, da kaba thombor ruh ia ka longrynieng ki kynthei, nalorkata ki la dung tari dung wait ia ki samla Khasi bad bun ruh ki Khasi kiba la shah shoh beit ha manla ki don ki thain ba la bun da ki mynder ri.
Dei halor kata ka nongrim, ba ki nongialam ka KSU ha kito ki por, kiba la iohi lypa ia ka jingma kaba la ap ia ki longdieng mandien, ki la mih shakhmat ban iakhun pyrshah ne ban beh noh ia ki mynder ri na ka Bri u Hynniewtrep, ha kaba ka jingiakhun kaba la jia ha ki snem 1987, ka la poi shaduh u pud ba ki nongialam bad dkhot ka KSU, ba kin hap iakhun pyrshah sa ia ki briew ka ain ne ki Pulit CRPF.
Shuh shuh, u la ong ruh ba dei ha ka 17 tarik u Jylliew jong u snem 1987, ba la don ka jingiakhih kaba jur bha ha Motphran bad katei ka jingiakhih, u lyoh ba dum u la wan ban tap ia ka Bri u Hynniewtrep hi baroh bad kata ka dei hadien ba u Biswal Paul Makri, u la shah siat ha ki Pulit CRPF bad uba la khlad noh na ka sla pyrthei.
Tang mar ia tip halor ka jingshah siat iap u Biswal Paul Makri, la khih win ka Bri u Hynniewtrep bad naduh katei hi ka por, ba la don ka jingbeh naphang ia baroh ki mynder ri, kiba shong ba sah ha kylleng ki bynta jong ka Bri u Hynniewtrep bad khamtam eh ha Ri Bhoi, ha kaba ka jingdon ki mynder ri ka jyllei bha ha kito ki por, hynrei da ka jingtrei borbah ka KSU bad ki paidbah, ka la pynlong ia ki mynder ba kin phet noh na ka Bri u Hynniewtrep.
Haba batai lynkot halor ka jinglenlade jong u Biswal Paul Makri, u Samla Donald V. Thabah, u la ong ba ki nongialam ba mynta jong ka seng, ki la ioh ban iakren bad uwei uba donlang bad u Biswal Paul Makri ha katei ka por ba jur ka jingiakhih, ha kaba uta u paralok jong u, u la kyntu ia u Biswal Paul Makri ba um dei shuh ban leit tur shakhmat, hynrei u Biswal Paul Makri, da ka jingshlur u la jubab ia uta u paralok, ba um tieng na bynta ban iada iala ki nongialam bad khamtam eh na bynta ka ri bad jaidbynriew.
