Shillong, Jylliew 17: Ka Myntri ka tnat ka koit ka khiah ka Kong Ampareen Lyngdoh ka ban jur ba ka Sorkar kam kwah ban don kum kine ki jingjia ba sngewsih ïaki paidbah khamtam ïaki longkmie ba armet.
Ïa kane ka Kong Ampareen kala kren halor ka jingkhlad noh ka longkmie ba armet naka shnong Jalaphet East Jaintia Hills haka por ba kala leit phah sumar ha MCH Panaliar Jowai West Jaintia Hills haka 2 tarik Jylliew.
Haba kren shaki lad pathai khubor ka Kong Ampareen kala pynpaw ïa ka jingsngewsih bad sngewkthang mynsiem bad kala pyntip ruh ba naka liang ka Tnat kala thaw Committee ban aiti ïaka kaiphod shaka Meghalaya High Court bad shaka Meghalaya Human Right Commission (MHRC).
Ka Myntri kala ïathuh ba naka liang ki bahaiing ka lanot kila ujor shaka Meghalaya High Court halor ka jingkhlad noh ka longkmie bad i khunlung bad naka liang ka Meghalaya Human Right Commission (MHRC) ruh kala shim hi ïa kane ka kam bad kala bthah ïaka Sorkar ban aiti ïaka kaiphod.
“Ngim lah ban shu ïa khana kumne halor kato ka jingjia ba sngewsih. Ngim kwah ban kynnoh mano ba bakla, kumno bakla, ngin ap ïaki kaiphod bad lada don kano kano ka jingbakla ka Committee kan sa pyni ïa kita bad ngi ruh ngin hap ban shim ïa kano kano ka Displinary Action lada lap ba don kum kata ka jingbakla” la ong ka Kong Ampareen.
Ka Myntri kala ong ba haduh mynta ka tnat kam lah ban shim ïa kino kino ki sienjam namar ki bahaiing kila leit sha Court. “Lada don ka jingbakla, kiba leh bakla ki hap hi ban bah khlieh hynrei namar ba ngim pat ioh ïaki kaiphod, ngam pat lah ban ong eiei halor kane” kala ong.
