Nongpoh,Ïaïong 08: Tang hadien ba la mih ha ki lad pathai khubor ïa ka jingpynsngew  u MLA ka Nongpoh Constituency u Bah Mayral Born Syiem ba la kynnoh ba u don kata ka jingmut ban ïakhun ïa ka election MLA 2028 na ka party NPP na Nongpoh Constituency, ka NPP Nongpoh Block ka la kyntait ba kam ioh jingtip ei ei halor kane ka khubor kaba ïa kren shaphang Ticket jongka Election MLA 2028 na Nongpoh Constituency.

Ka kyrwoh khubor mynta ka sngi ba la pynlait  da u President ka NPP Nongpoh Block u Bah Henry Nongrum bad u Secretary u Bah Bishar Tmung ki la pynshai paidbah da kaba pynpaw kumba long haduh mynta ka party NPP Nongpoh Block kam pat ïa kren ei ei shaphang ka Ticket, hynrei ka party ka dang ïa trei ban pyn khlain ïaka party ha baroh ki bynta jong ka Constituency.

La pynpaw ruh kumba long haduh mynta ki nongïalam ka party ha ka jingïalam ka Kong Rona Khymdeit, kaba dei ka MDC ki dang pynkhlain ïa ka party bad ka dei ruh kaba la pynjop don burom ïa ka party NPP na Nongpoh Constituency, kaba dei ruh hadien ka saw ka sian.

Namarkata, kitei ki nongïalam ki la pynpaw ba ki don ka jingkyrmen kaba khraw ba ka NPP Meghalaya State Unit kan sngap ïa ka jingsngew bad ka jingkyrpad rit ka Nongpoh Block bad kumba long ha ka election MDC 2025 dei ka Blok kaba la trei shitom ryngkat ka jingkyrshan radbah ki paidbah ka Nongpoh Constituency haduh ban da ioh ïa ka jingjop ba don burom.