Nongpoh, Naitung 14: U Myntri khynnah ka sorkar pdeng ba dei peit ïaka tnad Earth Sciences & Technology u Dr. Jitendra Singh mynta ka sngi u la lum jingïalang bad ki khlieh ophisar jong ki tnad sorkar bapher bapher ka Ri-bhoi District naka bynta ban buddien ïaki kam pynroi ka sorkar pdeng bala pyntreikam ha district Ri-Bhoi kaba dei ka aspirational district haka jylla.
Ïa kane ka jingïalang la pynlong ha North Eastern Space Application Centre (NESAC) kaba don ha Umiam ha kaba nalor utei u myntri la don lang ruh naduh u Dr. Abhishek Saini Deputy Commissioner ka Ri-Bhoi District, u Giri Prasad Superintendent of Police ka Ri-Bhoi, Bah Jonathan Shylla Additional Deputy Commissioner, lem bad ki khlieh ophisar naki tnad sorkar bapher bapher ka Ri-Bhoi District.
Ha kane ka jingïakynduh naka liang u Deputy Commissioner ka Ri Bhoi, u Dr. Abhishek Saini u la ai ka jingpynshai halor shibun ki kam pynroi kiba ki la leh ha kane ka district kaba la kiew shaphrang ha baroh ki liang lyngba ki skhim ka sorkar pdeng naduh ka koit ka khiah, ka rep ka riang ha kaba la sam ruh ki health card sha ki nongrep, ki kam pynroi sha ki thaiñ nongkyndong naduh ki lynti ki syngkien, ki umbam umdih, ka pule puthi bad kiwei kiwei.
Peit ruh:
Na ka liang u Dr. Jitendra Singh u la pynpaw ruh ba u sngewkmen ban ioh ban ïa kynduh ïa ki ophisar ka Ri Bhoi, kiba la trei shitom ha kawei ka kynhun ban kyntiew ïa kane ka District ha ka liang roi ka par bad kyntu ruh ïaki ophisar ba kin dang trei shitom naka bynta ban pyntreikam ïaki skhim bapher bapher khamtam ban wanrah ruh ki buit treikam kiba thymmai ba kane ka district kaba la tip ruh kum ka aspirational district kan kiew shaphrang ha baroh ki liang.
