Shillong, Ïaïong 23: Katba da ki hajar ngut ki paidbah ki dang sngap ïa ka jingïalang ka Voice of the People Party (VPP) kaba long hynnin ka sngi ha Motphran, hynrei uwei u rangbah briew  khlem poi pyrkhat u la shu kyllon kynsan ha madan ha kaba la rah noh ïa u mar mar sha Robert Hospital Shillong.

Kane ka jingkyllon utei u rangbah ka la jia kumba ha ka por 3 duna ei ei, ha kaba ha katei ka jingkyllon la rah noh mar mar sha Robert Hospital bad kaba sngewsih ka long ba hadien ba la poi ha katei jaka ai jingsumar ki Doctor ki la pynbna  ba u la khlad noh na sla jong kane ka pyrthei.

Une u rangbah la tip kyrteng kum u Bah Alos Nongpoh na ka Shnong Byrsiej ha ka thain Tyrso ha Ri Bhoi District bad u la bat ruh kum u Rangbah Shnong, kum u Secretary ka Tyrso Valley Wildlife protection Society, u President barim ka Bhoirymbong Block Hill Farmer Union bad u dei ruh u rangbah uba kham paw ha ka thain Mawlasnai ha Ri Bhoi  uba la ju trei ïa ki kam treimon sngewbha na ka bynta ka imalang ka sahlang.

Kumba la ioh lum jingtip ïa ka met une u rangbah la rah noh sha ka ingsah jong u ha ka Shnong Byrsiej naduh hynnin ka janmiet hadien ba la pynbna da ki Doctor ba u la khlad na katei ka jingkyllon bad ka jingleit ontep don burom ïa ka met ba dang sah jong u kan long ha ka 24 tarik u Ïaiong 2026.