Khliehriat, Jylliew 20:
Ki shipai Border Security Force (BSF) ki la kynnoh kylla ia ki paidbah ka shnong Kuliang ba ki pynmih jingklumar katba ki dang thmu ban kthong ia ki nong Bangladesh kiba donkti ban shalan tuh ia ka shini na India sha Bangladesh, haba katto katne na ki shipai BSF ki la mynsaw.
“Ha ka miet jong ka 19 tarik u Jylliew, 2024, ka kynhun kaba don kumba 30-35 ngut ki nongshalan beain na ka ri Bangladesh lyngba ka jingiarap jong ki briew shnong jong ki thain khappu, ki la ioh ban rung sha India lyngba ka jaka kaba ym pat ker, kaba dang hap hapoh ka Border Outpost jong ka Kuliang bad ka 172 Bn jong ka BSF. Ka jingthmu jong kitei ki nongwan rungtuh kadei ban wan shimti ia ki shini kiba la shalan beain da ki nong India kiba dei na ka shnong Kuliang” la ong ka kyrwoh na ki shipai BSF.
Ka kyrwoh na ki shipai BSF ka la iathuh ruh ba hadien ka jingioh jingtip halor katei ka jingthmu ban shalan beain ia ka shini, na ka liang ki kynhun jong ka BSF ki la leit ban jurip bad kita ki nong Bangladesh ki la phet sha ki bynta jong ka shnong Kuliang. Ha ka jingkthong ia ki nong Bangladesh, ki paidbah nongshong shnong jong ka Kuliang ki la mih ban pynibor da ka jingthmu ban ailad ia ki kitei ki nong Bangladesh kiba donkti ban shalan beain, bad sdang ruh ban kawang maw pyrshah ia ka kynhun jong ki shipai BSF ryngkat ki kyntien kiba sniew bad ki jingbyrngem.
