KHOT U MODI IAKA KASHMIR KUM KA KHYNDEW JONG KA YOGA, MIH PAIDBAH WAT HAPDENG KA JINGTHUD KA MARIANG

Srinagar, Jylliew 21: U Myntri Rangbah ka Ri u Narendra Modi mynta ka sngi u la lamkhmat ïaka jingrakhe ïaka 10th International Yoga Day ha Srinagar jong ka Jamu and Kashmir bala pynlong ha Sher-i-Kashmir International Conference Centre hajan jong ka pung ba itynnad ka Dal Lake bad kane ka dei ka sien ba nyngkong ba u Modi u leit iuhkjat ha katei ka thaiñ hadien ka jingshimti kum u Myntri Rangbah haka sien kaba lai.
Ka phang pdeng jong ka jingrakhe Yoga mynta u snem ka long ‘Yoga for Self and Society’ lane ka jingleh ïaka Yoga naka bynta ïalade bad ka imlang ka sahlang namar ka jingkoit jingkhiah kadei kawei naki dawai bah haka met jong u briew bad donkam ban sumar bad kilan.
Kum ban shu kdew hangne ba ïaka International Yoga Day la ju rakhe haka 21 tarik man u snem bad ka dei ruh ka kawei naki jait jinglehkai bala sdang na ka ri India naka bynta ka koit ka khiah jong ka met, ka pyrkhat ka pyrdaiñ, bad ka mynsiem bad ïaka kyntien Yoga la ioh naka ktien Sanskrit kaba mut ban snohkit lang lane ban ïatylli.
La sakhi ruh ba ha kane ka sngi naka liang ki heh myntri jong ka sorkar ba thymmai kila shim bynta haki jaka bapher bapher jong ka ri ban rakhe ïa ka international yoga Day.
Naka liang u Narendra Modi kum u Myntri Rangbah duh ka ri u la ai ka jingïaroh ïaki paid jong ka Jamu and Kashm,ir kila mih shakhmat ban shim bynta haka jingrakhe ïaka sngi Yoga wat hapdeng ka jingpynthud jong ka suiñ bneng, bad pynpaw ruh ba ka Yoga ka dei kawei naki jingdonkam jong ka jingim ba man ka sngi, namar ka met ka phad, ka jabieng bad ka mynsiem ki donkam ïaka jingkoit jingkhiah.
Ka jingmih paidbah ha Kashmir ban rakhe ïaka International Yoga Day ka dei ka jinglen lade ba ki paidbah ki pyni shaka pyrthei halor ka jingdonkam ka jinglehkai Yoga wat hapdeng ka jingpynthud ka suiñbneng hynrei ka tei ka jingrakhe kala long kaba ïaid beit ïaid ryntih.