Nongpoh, Naitung 15: Ki nongshong shnong ka Umdapdumu bad Umdap Rangi ba hap ha ka Umling C&RD Block ki la hap ban mad ka jingduhnong kaba khraw hadien ba ka eriong kaba jur ka la pynjulor ia bun tylli ki ïing ki sem, ki jingjung jingtep jong ki nongshong shnong.
Kane ka jingjia ka la jia hynnin ka sngi ha ka por 2 baje ei ei ha kaba la don ka jingkhie eriong kaba jur ha kaba ka eriong ka la pynjot naduh ki ing ki sem, u kwai, ka kait bad kiwei kiwei ki jaid jingtung kaba la wan rah ka jingduhnong ia kito kiba mad ha katei ka jingshah ktah ha ka eriong.
Halor kane ka jingshah pynjulor kitei ki ing ki sem bad ki jingthung jingtep, la ioh ban ia kren bad ki Nongialam Shnong u Bah Alexander Maring, Rangbah Shnong Umdaprangi bad Julius Maring Umdapduma ha kaba ki la iathuh ba kane ka jingwan kynsan ka eriong ka la ktah ia ki nongshong shnong bad palat 20 tylli ki ing ki la julor bad kynthup ruh u kwai, ka kait bad kiwei ki jingthung.
KI la iathuh ruh ba kane ka jingwan ka eriong kaba jur kam shym la shah ktah tang ki iing ki sem, ki jingthng jingtep bad ka eriong ka la pynkyllon ruh ia ki nar post ilektrik, ha kaba mynta ki hap ban shong hadeng ka jingdum ba ba ki nar post bad ki sainar ilekrik ki la dkut bad kyllon bun tylli.
Shuh shuh, ha kaba ia dei bad kane ka jingshah pynjulor ha ka mariang, kitei ki nongialam shnogn ki la kyrpad na ka sorkar ba kan phah ban wan jurip bad ruh ban thaw ki lad jingiarap na ka bynta kito ki longïing kiba la shah ktah jur ha kane ka jingpynjulor ka eriong.
