Shillong, Ïaïong 21: Ha ka jingtwa maw kaba shyrkhei kaba la jia hynnin ka janmiet ha ka por 5.30 shiteng ha Mawlieh ka surok ban leit sha Pynurla, ki ar ngut ki rangbah kiba la khlad noh ha katei ka jingjia la tip kyrteng kum Nangteibor Khongthorem 46 snem ka rta, uba niah ïa ka Kali Bolero Pickup na ka shnong Lumwahniai bad uwei pat uba shong lang ha katei ka Kali la tip kyrteng kum u Wanbor Nianglang 40 snem ka rta na ka shnong Pynursla Proper.

Halor katei ka jingjia, ki Pulit bad ki bor District naduh hynnin ka janmiet ki la poi sha katei ka jaka ban sei ïa ka met jong kitei ki Rangbah bad hapdeng ka jingjur slap ki la ïakhun tyngeh haduh ba la dep ban sei ïa ka met bad hadien ka jingtohkit kaba bniah la aiti noh ïa ka met ba dangsah kitei ki rangbah sha kiba haïing hasem  na ka bynta ban leh burom khatduh ïa ki.

Kum ban pynkynmaw, kane ka jingjia ka dei ka jingjia kaba kham sngew shyrkhei ha kaba ki maw heh ki la twa kynsan haduh ban da ban ïa katei ka Kali Bolero Pickup kaba la jot rathai. La ioh jingtip ruh ba na ka liang kiba haïing hasem ki la pyndep ruh ban ontep don burom ïa kitei ki ar ngut kiba duh ïa ka jingim na katei ka jingjia kaba la ham shyrkhei kaba dei na ka jingtwa kynsan ki maw.