Khliehriat, Ïaïong 21: Ki 2 tylli ki Seng Bhalang na Rilum Jaintia ba kynthup ïa ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) ha ka lama ka Joint Action Committee (JAC) ha ka jingïalang kaba la long mynta ka sngi ha Tuberkmaishnong Tahkhniang ki la shim syndon da ka rai kaba tyngeh ban pyrshah ïa ki Cement Plant ha Lumshnong, East Jaintia Hills ha kaba ki la pynbna da ka jingïakhih ban khang naphang ïa kino kno ki Trok ba leit kit cement na ki Cement Plant ha Lumshnong.
Kane ka jingïakhih ban khang ïa ki Trok ban leit kit Cement na ki Cement Plant kan sdang naduh ka 24 tarik u Ïaiong 2026 naduh ka por 10 baje mynstep.
Haba kren shad ki lad pathai khubor, u Secretary ka Joint Action Committee u Bah Kyrshan Dkhar u la ong ba kane ka jingïakhih ban khang ïa ki Trok ban leit kit cement kynthup ruh ïa ki Bulker Truck, ka de ka jingleh kuman ka Star Cement ban tuklar halor ki mat jingdawa ba la ai da ka shithi bad ruh ba la phah Copy sha u Deputy Commissioner bad Superintendent of Police ka East Jaintia HiIls.
U la ong ruh ba ka JAC ki ar seng ka la rai tyngeh ban kahng ïa baroh ki Kali ba kit Cement na Star Cement bad Dalmia Cement kynthup kito kiba mut rung ne mih na kitei ki Cement Plant.
U la bynrap ruh da kaba ong ba ka JAC kan nym pdiang shuh ïa ka jingkhot ïa kren ki Cement Company bad ka JAC ka la maham ruh ïa baroh ki Trok ba kim dei ban leit kit Cement bad lada ki ïaleh pyrshah ka JAC kan shim da ka lad kaba tyngeh kaba dei tang na ka jingleh kuman ki Company khlem da suidniew ïa ki mat jingdawa ka JAC.
Haba kren halor ka jingpynpaw ka Jaintia Hills Cement Manufacturers Association (JHCMA), kiba pyrshang ban ïada ïa ki Bulker Truck ban kit Cement ban ailad ban kit sha kino kino ki jingtei ba dang pyntrei ka sorkar ka JAC ka la kyntait ba kitei ki Bulker Truck ki la knieh ïa ka bhah jong ki kali jong ki ba ju kit cement na kitei ki Cement plant bad ki la rai ruh dang bteng ka jingpyrshah ïa ki Bulker Truck kiba thmu ban wan kit Cement na kitei ki Cement Plant.