Nongpoh, Naiwieng 21: Shibynta ka thong jong u Myntri Rangbah ka jylla ban wanrah ïaka jingkhuid bad ka jingjyrngam bala tip kum ka Chief Ministers Youth for Green Campaign Movement 2025, ka ophis u District Sports Officer ka Ri-Bhoi District haka jingtreilang bad ka Nongpoh Town Committee lem bad ka Ri-Bhoi Cycling Association mynta ka sngi ban pynshlur ïaki paidbah ban ïaid kjat ne ban pyndonkam da ki cycle haki lynti kiba jan ban pynduna ïaka jingpyndonkam ïaki kali da kaba pynlong ruh ïaka prokram ñiah cycle ne ka Bike Campaign Ride lem bad ka prokram ai jinghikai kaba la pynlong ha khmat ka Nongpoh Town Shopping Complex.

Ka jingthmu jong kane ka Green Campaign Movement ka long ba pynshlur ïaki paidbah ban sumar bad kyrshan ïaka mariang lyngba ki kam lehkhuid kiba lah ban wanrah ka jingkylla haka mei mariang kaba ngi im man ka sngi da kaba pynduna ïaka jingpynmih ïaki jaboh, ban thung bad sumar ïaki dieng ki siej, ban pynduna ka jingpyndonkam ïaka bording ilektrik bad ruh ban nym pynsepei than ïaka um, ban pynkhuid ïaki sawdong sawkun bad kiwei kiwei kiba ngi lah ban leh man ka sngi.

Ha kane ka sngi la sakhi ruh da ka jingdonlang ka E Pradhan Assistant Commissioner ka Ri-Bhoi District, u Bah Bobby L Nongbet DSO, ka kong Rida Lyndem PTI ka ophis u DSO, ki samla pule, ka kynhun ki nongñiah cycle na Ri-Bhoi bad kiwei kiwei.

Haba kren ha kane ka sngi kum ka kongsan, ka E. Pradhan ka la ong ba kane ka pyrthei kam dei kaba ngi long trai bad ka dei kaba la ai sngewbha da u Blei bad namar kata ka dei ka kamram jongngi ba ngin sumar iaka da kaba ngi hap ban iada ia baroh kiba don hapoh jongka bad khamtam ban nym pynjot pathar ia ka pyrthei kaba buh jingma ia ka jingim briew.

Ka la kren ruh halor kata ka jingkylla ka bor mariang kaba la buh jingma ia u khun bynriew, ha kaba lada ngim nang ban iada ia ka maraing kan wan ka jingeh ha ka pateng ban sa wan khamtam ka buh jingma ia u khun bynriew.

Ka la pynshai ruh ba halor ka jingkylla ka bor mariang la ia kren ha kylleng ki ri ka pyrthei, namar kane ka ap ka jingma ia u khun bynriew bad namar kata kum ki paidbah ki hap ban ai ka jingkyrshan na ka bynta ban iada ia ka mariang da kaba ngim de ban pynjot pathar iaka mariang bad ngim dei ban bret pathar ia ki jaboh kiba ktah ia ka bor mariang.

Shuh shuh, ka la ong ruh ba la wan rah ia kane ka Green Campaign movement ka dei ka thong ban ialap sha ki paidbah ne ki nongshong shnong ba ki hap ban don kata ka jingkitkhlieh lang naduh ban iada ia ki tyllong umbam, ka jingiada ia ki mariang, ka jingpynduna ban pyndonkam ia ka bording iletrik bad kiwei kiwei ki lad kiba lah ban pynduna ia ka jingjaboh ne ka jingktah ia ka mei mariang, ka la bynrap.