Nongpoh, Naitung 11:Ka seng jongki nongshet-nongiarap ka skhim PM Poshan ka jylla Meghalaya lane ba la ju tip paidbah kum ki nongshet ja Mid-day Meal ha ki skul ha ka jyla, kaba la tip kum ka Union of Cook-cum-Helpers mynta ka sngi kala pynlong iaka General Meeting ha CFC Hall Umsning ha kaba da ki spah ngut ki dkhot na kylleng ka Ri Bhoi District kila wan ban iadon bynta lang.
Ha kane ka jingialang la wan ban iadon ryngkat ruh naduh ki nongialam ba hakhmat ka seng kiba kynthup iaka President Kong Gina Nengnong, u Secretary Bah Charles Star Shongwan, Adviser Bah K.L. Pariat, ka President jongka seng na Ri Bhoi Kong Banalis Syiem nalor kiwei kiwei de.
Kawei na ki mat ba kongsan eh kaba la ia mir jingmut ha kane ka sngi, kadei halor ka jingbym pat siew ka sorkar iaka Honorarium haki lai bnai kynthih ba kynthup naduh u bnai Iaiong, Jymmang bad u bnai Jylliew. Ki nongialam ka seng kila pyntip ba wat hadien ba la dep ban iakren ia kane ka mat bad ki bor ba dei khmih, hynrei katei ka Honorarium ym pat pyllait satia kaba la buh iaki hapdeng ka jingeh kaba khraw. Na ki dkhot ruh kila pynpaw iaka jingsngewkhia jur halor kane ka jingpynsahteng ia katei ka Honorarium kaba la long saw bnai lynter tad haduh mynta u bnai Naitung.
Ka seng kala buh iaka jingkyrpad shaka sorkar jylla bad wat ia ka sorkar kmie ba kadei ban pynthikna ban pyllait noh mardor ia katei ka Honorarium kaba sahteng bad kyntu ruh iaka sorkar ba kadei ban siew biang por manla u bnai shaki nongshet bad nongiarap kiba hap hapoh ka skhim PM Poshan.
Naka liang jong ki dkhot kiba iadon lang ha kane ka sngi, kila kyrpad ruh shaka sorkar pdeng ba kan pynheh iaka Honorarium naba ka jingsiew kumba long mynta ka dang duna palat haba ia nujot bad ka kam kaba ki trei ban ai iaki jingbam tei met sha ki khynnah skul.
Nalor ka jingiamir jingmut halor kiba bun ki kam kiba iadei bad ka bha ka miat ki para nongtrei, ka seng kala pynlong ruh iaka jingai jinghikai paidbah sha ki para dkhot ban pynshlur ba kidei ban trei bha iaka kam bad pynthikna ba ki jingbam kiba ai sha ki khynnah skul, kidei ban long kiba paka bad ba lada lap ia kino kino ki jingduna bad ki mar bam kiba la sniew, kidei ban ujor mardor sha ki bor ba dei khmih.
Peit ruh:
Ka seng haba pynwai ia kane ka jingialang, kala kyntu sha ka sorkar jylla bad sorkar pdeng ba kin shimkhia ban pynurlong ia kitei ki jingkyrpad ki jongki bad ai ruh iaka jingpynthikna ba kin ai iaka jingkyrshan ba pura ba ka jingpyntrei iaka skhim PM Poshan hapoh ka jylla Meghalaya kan long kaba jop.
