Shillong, Naitung 10: Wat la ka Election Commission ka ri India kam pat shym la pynbna ban pynlong ia ka MP election shiteng samoi jongka Shillong Parliamentary Constituency ba la hap ban pynlong hadien ka jingkhlad noh u MP barim u Dr. Ricky AJ Syngkon, u Kyrtong ka NPP Party u Dr. DRL Nonglait mynta ka sngi u la hiar sha Mawshynrut Constituency ban pynlong da ka jingialang paidbah ha Iew Riangdo ban pan ka jingkyrshan na ki paidbah ban pynjop don burom ia u halor shibun ki Nongrim kiba u angnud ban pynurlong lada ki paidbah ki pynkup bor ia u.
Ha kane ka jingialang paidbah jong ka jingialap election u Dr. DRL Nonglait la don lang ruh naduh Myntri sorkar bad uba dei ruh u MLA ka Jowai u Bah Wailadmiki Shylla, u State Working president ka NPP u Bah Hamlet Dohlieng, u Nongaiktien ka NPP party u Bah H.M Shangpliang, u MLA ka Mawhati u Bah Charles Marngar, u MDC ka Rambrai u Bah Lurshai Kharbani, u Bah Jigur Myrthong President ka NPP Mawshynrut Block lem bad kiwei kiwei ki nongialam.
Ka jingwan ai mynsiem jong kiba bun ki nongshong shnong naduh ki Longkmie, ki longkpa bad ki khun samla ha kane ka sngi ialap election ha iew Riangdo ka la dang ai mynsiem ia u Dr. DRL Nonglait ha kane ka jingiaid lynti ban leit pynshai sha u paidbah na ka bynta ban aireng ha kane ka MP election shiteng samoi na Shillong Parliamentary Constituency.
Haba kren ha kane ka sngi u Dr. DRL Nonglait u la pynpaw ba ka sorkar NPP ka la dep leh shibun ki kam pynroi wat ha katei ka thain Mawshynrut bad ka daw kaba la pynlong ia u ban mih ban aireng ha kane ka MP election shiteng samoi ka long ban dang ia khun shuh kiwei kiwei ki kam pynroi kiba angnud ban wan rah hapoh ka jylla.
U la kren ruh halor shibun ki bynta ba ka thain Mawshynrut ka dei ka thain kaba dang sahdien bha ha ki por ba la leit noh, hynrei mynta la wan shibun ki jingkylla ha kaba ka sorkar NPP ka la phai khmat lang ia ki kam pynroi ki paidbah bad ka ha kawei pat ka bynta haba pan jingkyrshan na ki paidbah ban jop ka long ba u don ka thong ban dang wan shuh shuh ki kam pynroi ba man la ki dong ki thain ha ka jylla ki dang donkam.
Shuh shuh, kum u kyrtong ka NPP u la pynpaw ruh da kaba ong ba lada ki paidbah ki pynjop ia u ha kane ka kynti, un pyrshang ban pynurlong ia shibun ki jingangnud kiba u kwah ban wan rah ha ka jylla bad ula kren ruh naduh ka Ktien Khasi ba mynta ka la long kum ka ktien sorkar bad kaba dang sah mynta sa ha ka sorkar pdeng ba kan pynrung ha ka khyrnit ba phra ka riti synshar ka ri.
U la bynrap ruh ba lada u jop, un ia khun ym tang ia ka Ktien Khasi, hynrei ki don bun byllai ki mat ki jura kiba dang donkam ha ka jylla bad dei tang lada ki paidbah ki pynkup bor un lah ban iasaid ne ia kren sha ka sorkar pdeng ne ha parliament, u la bynrap.
Sa peit ruh
