Nongpoh, Risaw 8: Ka ophis u Block Development Officer ka Jirang C&RD Block mynta ka sngi 8 tarik Risaw ka la pynlong ia ka program ban sam ia ki tiar jingiarap sha kito kiba don jingduna ha ki dkhot met bad ruh na ka bynta kito ki riew tymmen kiba la noh ka rta (Senior Citizen), ia kaba la pynlong ha Jirang C&RD Block.

Ka jingsam ia kitei ki tiar ka long kum shi bynta Ban phai khmat kyrpang sha kito kiba don ka jingduna ha ki dkhot met bad na ka bynta kito ki riew tymmen kiba la noh ka rta, ha kane ka sngi la wan ban sakhi ban don bynta lang da u Bah Sosthenes Sohtun Myntri ka tnad C&RD bad uba dei ruh u MLA bad MDC ka Jirang Constituency kum u kongsan bad la sakhi lang ruh da ka jingdon lang u BDO ka Jirang C&RD Block,u P. Hajong, ka District Socieal Welfare Officer ka Ri Bhoi ka Kong S. Sun, ki nongmihkhamt na ka Artificial Limbs Manufacture Corporation of India, kaba la iarap kyrpang ia kitei ki tiar sha kitei ki briew ba don jingduna ha ka dkhot met bad ki riew tymmen.

Ia Kine la ai kyrpang tang na ka bynta ki Riew Tymmen bad kiba duna haki dkhot met kiba hap ha ka Jirang block kiba la kot haduh 530 ngut ki ban ioh jingmyntoi lyngba kitei ki tiar bad napdeng ki 530 ngut mynta ka sngi la ioh ban sam sha ki 200 ngut ki nongioh jingmyntoi.

Kine ki tiar ba la sam mynta ka sngi ki kynthup naduh ki Wheelchair, ki Trycyle , ki Diengduh na ka bynta kiba dkoh bad ki bym nangiaid, ki tiar jingpynpsawa lane ki Stranger Sound System sha kita kiba duna Dkhot met kiba don ia ki sap ha ka rwai ka siaw, u tiar pyniohsngew lane u Ear Machine Device na ka bynta kito ki bym ioh sngewbha  ha ki skhor bad kiwei kiwei.