Nongpoh, Risaw 08: Ban phai khmat kyrpang sha ki samla kynthei bad ki Longkmie kiba ym don kam don jam ha kum kane ka pyrthei kyrduh kam kyrduh jam, Ka LS Syiemlieh Production bad ryngkat ka jingiatrei lang bad ka Nangkiew Shaphrang MPCS mynta ka sngi ki la pynlong da ka prokram ai jinghikai ia ki samla kynthei bad ki Longkmie kiba dei shaphang ka kam thain  jain bad thir ksai ka ban long kum ka jingplie lad plie llynti ha ka liang ka ioh kam ka ioh jam.

Ia kane ka prokram ai jinghikai la pynlong ha Quinine Nongladew ha kaba la wan ban shim bynta lang da ka District Handloom Officer ka Ri Bohi ka Kong Deinie Tariang ryngkat ka jingdon lang u Bah Lansius Syiemlieh kum u Producer ka LS Syiemlieh Production, ka Kong R. Kharmawphlang na ka Nangkeiw Shaphrang MPCS lem bad ki samla kynthei bad ki Longkmie na katei ka shnong.

Kumba la pynpaw da u Bah Lansius Syiemlieh, la ong ba ka jingthmu kane ka prokram ka long ruh ban pynshlur ia ki samla kynthei bad ki Longkmie kiba dei na ki shnong khap sor ha ka surokbah National Highway ba ki dei ban mih shakhmat ha kam thain jain bad ka thiar ksai, namar kumba long baroh shi katta kita ki Longkmie kiba im ha kane ka jaid kam ki dei tang na ki Shnong Nongkyndong ka District.

U la ong ruh kane ka jaid kam ka dei ruh kawei na ka jaid kam kaba ai jingmyntoi na ka bynta ki samla bad ki Longkmie khamtam ha ka kam thaiñ jain bad thiar ksai kum ka jaid ryndia kaba la bna nam ha ka pyrthei, ha kaba lada ngi lah shisha ban pynjanai kan long ka jingmyntoi ia ki samla ne ki longkmie kiba ym don kam don jam.

La ai jingkren ruh ha kane ka sngi da ka Kong Deinie Tariang kum ka District Handloom Officer ka Ri Bhoi kaba la pynshlur ia ki samla bad ki longkmie ban mih sha khmat ha kane ka kam thain ne ka kam thir ksai bad lada ki lah shisha ban leh janai ka long shisha ka jingmyntoi ha ka liang ka ioh kam ka ioh jam.