Nongpoh, Naiwieng 03: Mynta ka janmiet ki paidbah ki la khih win ha sor Nongpoh hadien ba la lap ia kawei ka pla ïong ba la suba ka lah ban dei ka pla ba don u bom.

Kum ban pynkynaw, dang shen la lap ia kawei ka pla ïong ha Usmning ba la suba ba dei u bom bad ha ka jingohtkit ki pulit la lap shisha ba dei u bom IED bad ia kane la paw ruh ha ki lad pathai khubor ba ka HNLC ka la kam ba dei ba buh ma ka ha katei ka jaka ha Umsning.

Mynta ka janmiet ruh la lap baing ia kawei ka pla ïong ba la buh harud surok ha kaba la suba jur ba lah ban dei u bom bad halor kane ka jinglap ia u Bom la wan poi ki bor pulit bad la khang ia ki paidbah ban tur sha jan bad wat ia ki Kali paidbah ruh la pyniaid tang na kawei ka surok ha kane ka surok national Highway-6 ha Ri Bhoi.

Na ka liang ki pulit ki la shim khia ban tehalam ia ki paidbah bad ruh ki la pyntip sha ka kynhun bomb Squad ban wan na Shillong na ka bynta ban tohkit ia katei ka pla ïong ba la suba ba lah ban don u bom hapoh katei ka pla ïong.