Shillong, ïaïong 06: Ki bor pulit ka East Khasi Hills District mynta ka 6 tarik Ïaiong ki la leit ban tam ïa kawei ka metiap jong kawei ka longkmie, ïa kaba la lap na kawei ka wah kaba don ha khappud ka Shnong Nongrah Lummyrboh bad Rynjah.

Katkum ka jingtip ba la iohlum, la ïathuh ba ki pulit tang mar ïa ioh jingtip halor ka jinglap ïa kawei ka metiap, ki la leit sha katei ka jaka ban tam ïa kane ka metiap jong ka longkmie ka dei kaba la sdang pyut bad la lap ba la thep ha kawei ka plastic.

Ha ka jingleit tam ïa katei ka metiap, ki pulit na Nongrah ha ryngkat ki pulit ka Crime Scene, ki pulit na forensic lem bad u Superintendent of Police ka East Khasi Hills District u Bah Vivek Syiem ki la poi sha katei ka jaka ban tam ïa ka metiap bad ban lum ïa ki sakhi satar.

Na ka liang u Bah Vivek Syiem, u la pyntip ba hadien ka jingtohkit la lap ba kane ka metiap ka dei jong kawei ka longkmie ka Eilang Phawa (38) kaba na Lawjynriew Nongthymmai bad ka shnong trai pat na West Jaintia Hills, kane ka longkmie ka dei kaba la jah na la iing naduh ka 20 tarik u bnai Lber.

La suba jur ba ïa kane ka longkmie, ka dei kaba la shah pyniap dusmon bad thep ha ka plastic bad bret ha katei ka wahduid.

Hadien ba la tam ïa ka metiap, ki pulit ki la rah noh ïa ka metiap sha NEIGHRIMS hospital ban leh ïa ka post mortem bad ki dang ap ïa ka kaiphod, la rejister mukotduma halor kane jingshah pyniap jong katei ka longkmie ban thwet ruh ïa ki runar kiba donkti.