Nongpoh, Nailar 14: Ban ai mynsiem bad ban kyrshan ia ki nongshong dukan bad ruh ia ka Nongpoh Shopping Carnival ba la pynlong ha Nongpoh Town Shopping Complex, ka Kong Rona Khymdeit kum ka MDC ka Nongpoh Constituency mynta ka sngi ka la leit ban ia don bynta ha katei ka tamasa jong ka iew ka hat kaba long kawei na ka iew pyninam ban kyntiew ia ki Nongshong dukan ha katei ka Shopping Complex.
Kum ban pynkynmaw, kane ka Nongpoh Shopping Carnival ka la sdang hynnin ka sngi ba la wan plie da u Deputy Commissioner ka Ri Bhoi u Abhilash Baranwal bad ka dei ruh ka iew pyni nam kaba 4 sngi ka ban sa kut ha ka 16 tarik u Nailar 2025.
Kumba la pynpaw da ka Kong Rona Khymdeit kum ka local MDC ka thaiñ, ka daw kaba la pynlong ia ka ban leit jngoh ia katei ka iew, ka long ban ai mynsiem ia ka Nongpoh Town Shopping Complex Committee bad G&RC Store kiba la pynlong ia kane ka iew pyni nam, kaba long ruh ka jingai mynsiem ia ki nongshong dukan ha katei ka Complex bad da kaba pynpaw ruh ba ka don ka jingangnud ba katei ka Complex kan iaid iew khnang ban ai jingmyntoi ia ki nongshong dukan ha ka kamai kajih bad ruh ban kyntiew ia ka ioh ka kot jongki na ka kam shong dukan.
