Nongpoh, Nailar 14: Ka Vice Chairman ka sorkar jylla kaba dei peit ia ka Public Grievances bad kaba dei ruh ka MDC ka Nongpoh Constituency, ka Kong Rona Khymdeit mynta ka sngi ka la leit jurip ia ka jinglong jingman hapoh ka ophis u District Transport Officer ka Ri Bhoi, kaba dei hadien ba ka la ioh pdiang shibun ki jngujor na ki nongshong dukan bad ki paidbah ba katei ka ophis ka don hapdeng shibun ki jingduna.
Ka Kong Rona Khymdeit kum ka Vice Chairman ka sorkar jylla ba dei peit a ka Public Grievances, ka la leit ruh ban jurip ia katei ka ophis u District Transport Officer ka Ri Bhoi, kad ei hadien ba ka la wna ban kynduh ruh dang shen ia u Myntri ka tnad Transport bad uba dei u symbut myntri ka sorkar u Bah Sniewbhalang Dhra ban pynsngew halor shibun ki jingduna kiba don ha katei ka ophis sorkar.
Ha ka jingialam ka Kong Rona Khymdeit bad ba la synran lang ruh kiwei ki nongialam bad ki nongshong dukan ki la ioh ban ia kynduh ia u District Transport Officer u Bah I. Kharmon bad u MVI ha kaba ki la pynlong lang ia ka jingjurip ia shibun ki jingduna kiba don ha katei ka ophis treikam.
Ki jingduna kiba hakhmat eh ka long naduh ka building kaba la jot rathai, ka jingsniew ki bynta jong ka phyllaw, ka jingbym biang ki Painkhana, ka jingbym biang ka um bad kumjuh ruh ki dukan kiba la jot, bad la pei um ba la donkam ban maramot ne pynbha.
Haba kren ha kane ka snig, na ka liang ka Kong Rona Khymdeit kum ka Vice Chairman ka Public Grievances ka la ong ba ka daw kaba la pynlong ia ka ban wan jurip ia kane ka ophis u District Transport Officer, ka dei hi halor ka nongrim ka jingud jingnam ki nongshong dukan bad ruh ki riew paidbah kiba la kyrpad ban tuklar lem na ka bynta ban pynbit pynbiang ia ki jingduna kiba don hapoh katei ka ophis treikam.
Ha kane ka jingjurip, ka la kular ruh ban ia kren ia kitei ki jingduna kibadon hapoh katei ka ophis treikam sha ka sorkar jylla lyngba u Myntrei ka tnad Transport bad ka la iathuh ruh dang shen ka la wan ban ia kynduh ban kren ia kitei ki jingeh bad kumba la lap ha ki jingduna ha kane ka jingwan jurip kan sa pynsngew sha u myntri ka tnad Transport ban thaw ia ki lad ki lynti ban pynbiang ia kitei ki jingduna naduh ka jingrim ka building, ka jingbym biang ka Painkhana, ka jingbym biang ka umbam ka umdih bad ka jingjot ki dukan paidbah kiba don ha phyllaw kane ka ophis treikam.
Shuh shuh, ka la pynpaw ruh ba ka don ka jingangnud ba katei ka ophis u DTO kan long biang kum ha ki por ba leit noh kaba itynnad bad kaba khring ia ki nongjngaikai pyrthei da ka jingheh jong ka phyllaw bad ruh ka jingdon jong ki dukan paidbah bad la jin ba lah ban pynbha ne pynitynad ka jingmyntoi kan long ia ki nongshong dukan haba wan rung wan mih ki nongjngohkai pyrthei kumba long ha ka por ba mynshuwa, ka la bynrap.
